Erkin kúrestiń erleri anyqtaldy

Balýandar básekesiniń al­ǵash­qy kúninde «Qaraǵandy Arenaǵa» jınalǵan jankúıerler 74 kılo salmaqtaǵy sportshylardyń sa­ıysyn qyzyǵa tamashalady. Sebebi bul salmaq dárejesinde kil myqtylar jınalǵan eken. Solardyń arasynan Nurqoja Qaıpanov pen Danııar Qaısanov sýyrylyp shyqty. Biri – eli­mizdiń soltústik, ekinshisi – shyǵys óńiriniń týmasy. Ekeýiniń de esimi qalyń kórermenge etene tanys. 24 jastaǵy Nurqoja 2019 jyly Nur-Sultandaǵy álem chempıonatynda kúmis medaldy moınyna ilip, 2019 jáne 2021 jyldary Azııa birinshiliginde bas júldeni oljalady. Osydan eki aı buryn Mońǵolııada ótken Sary qurlyqtyń basty dodasynda Qaıpanov kúmis medaldy ıelendi. 28 jastaǵy Danııardyń álem chempıo­na­ty­nyń qola jáne Azııa oıyn­darynyń kúmis júldegeri degen ataqtary bar. Qaısanov ta Azııa chempıonatynyń altyn tu­ǵy­ryna eki márte kóterildi.

Negizi «Qaıpanov myqty ma, Qaı­sanov pa?» degen suraq jankú­ıer­lerdiń kókeıinde kópten beri júr­gen edi. Osyndaı saýal jol­danǵan sátte kópti kórgen kánigi bapkerlerdiń ózi de jaýap bere almaı, biraz ábigerge túskenine san márte kýá bolǵanbyz. Bul joly qos myqtynyń joly fınalda túıisti. Birinshi kezeń tek ań­dasýmen ótti. Sońǵy sátte al­ǵashqy upaı Danııardyń enshi­sine jazyldy. Onyń ózinde jasal­ǵan utymdy ádisi úshin emes, bel­sendiligi úshin berildi. Úzilis­ten keıin Qaısanov jıi shabýyl­daǵanymen, qarsylasy únemi onyń aldyn orap otyrdy. Son­daı mezetterdiń birinde qar­sylasynyń artyna shyǵyp, eki upaıdy ıelendi. Biraz ýaqyttan soń qaıta dál sondaı áreketke bardy. Aqyrynda amaly taýsylǵan Danııar qarsy­lasýdy qoıdy. Nátı­jesinde, 14:3 esebimen jeńiske jetken Nur­qoja Qaıpanov Qazaqstan chempıony atandy. Al qola medaldy pavlodarlyq Azat Saqaev pen Almaty oblysynyń ókili Ernar Satybaldy ıelendi. 

Dál osy salmaqta  álem chempıo­natynyń kúmis júldegeri Nur­lan Bekjanov pen jýyrda ǵana Al­matyda ótken «Bolat Tur­ly­hanov kýbogynda» óreli óneri­men kózge túsip, kúmis medal­dy ıelengen Rodıon Anchýgın de kúresýge tıis edi. Alaıda jara­qatyna baılanysty olar boz kilemge shyqpady. Elimizdiń taǵy bir bedeldi balýany Aza­mat О́mirjanov bolsa, alǵash­qy aınalymnan asa almady.

79 kılo salmaq dárejesiniń fınalynda atyraýlyq Bolat Saqaev pen mańǵystaýlyq Jiger Zákirov beldesti. Bul tar­tys alǵashqysynyń paıdasyna she­shildi. Taıaýda ǵana Almatyda uıym­­dastyrylǵan «Bolat Tur­ly­­hanov kýbogynda» dál osy ba­lýan er­kin kúresten Qazaqstan qurama­synyń qorjynyna jalǵyz al­tyndy salǵan edi. Bul joly da Bolat óziniń babynda ekenin baıqatty.

57 kılo salmaqta jambyldyq Rahat Qaljanǵa teń keler esh­kim tabylmady. Fınalda ol shymkenttik Jahanger Ahmat­ja­novtan aılasyn asyrdy. Shym­kent qalasynyń taǵy bir balýany Asyl Aıtaqyn men Almaty oblysynyń ókili О́simjan Dastanbek 61 kılo salmaq dárejesiniń bas júldesin ózara sarapqa saldy. Bul básekede Asyldyń asyǵy alshysynan tústi. 97 kılo salmaqta Mamed Ib­ragımov el chempıony atandy. Pavlodarlyq balýan fınalda qaraǵandylyq Serik Baqyt­hanovtan basym tústi.