SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, oblysta kókjótelmen aýyrýdyń alǵashqy jaǵdaıy tirkeldi. Infeksııalyq aýrý 3 jas 8 aılyq balada anyqtalǵan. Sábıdiń ata-anasy kókjótelge qarsy ekpe alýdan bas tartqan eken.
«Kókjótel - bul kóbinese balalar aýyratyn jáne belgili bir klınıkalyq kórinisi men belgileri bar ınfeksııalyq aýrý. Kókjóteldiń ereksheligi - tynys alý fýnksııasy buzylyp, aýrý órshigen kezde tynys alý joldarynyń shyryshty qabattary zaqymdanady. Asqynýlar eki jasqa deıingi sábıler men qarttarǵa tán. Alaıda, kez-kelgen jasta aýrý ál-aýqatty edáýir nasharlatýy múmkin, sondyqtan kókjótel belgileri men ınfeksııanyń aldyn-alý ádisterin bilý kerek», deıdi departamenttiń ınfeksııalyq jáne parazıttik aýrýlardy epıdemıologııalyq baqylaý bóliminiń basshysy Saltanat Bekqojına.
Mamannyń aıtýynsha, kókjóteldiń belgileri joǵarǵy tynys joldarynyń bakterııalyq ınfeksııasyna uqsas, ıaǵnı dene qyzýy +38°S-qa deıin kóteriledi, adam qaltyrap, álsizdik, bulshyqetterdegi «aýrý», bas aýrýy paıda bolady. Murynnan sý aǵyp, biteledi, qurǵaq jótel mazany alady.
«Infeksııa aýyrǵan adammen tyǵyz baılanysta bolǵan kezde aýa-tamshy jolymen juǵady. Aýrý adam 30 kún boıy ınfeksııany tarata alady. Kókjótelge qarsy negizgi aldyn alý sharasy vaksınasııa. Ulttyq vaksınasııa kúntizbesine sáıkes, sábılerge qoıylatyn alǵashqy vaksınalardyń biri – AKDS balalardy 3 aýrýdan: dıfterııa, sirespe jáne kókjótelden qorǵaıdy. Kókjótelden maksımaldy qorǵaý úshin sábılerge 3 vaksına salynýy kerek. Alǵashqysy eki aıdan asqasyn qoıylsa, kelesi vaksınasııa 4 aıda, al úshinshisi bir jarym jasta júrgiziledi», deıdi Saltanat Bekqojına.
Byltyr SQO-da kókjótelmen aýyrý jaǵdaıy tirkelmese, 2020 jyly 15 adamǵa osy dıagnoz qoıylǵan. Aýrýdyń ósýiniń negizgi sebebi - ata-analardyń vaksınasııadan bas tartýy.
Aıana Toǵanbek
