«Shashý» halyqtyq ansambliniń repertýary óte baı. Halyq kompozıtorlarynyń kúıleri men ánderi, qazaq, orys jáne shetel kompozıtorlarynyń shyǵarmalary da bar. Qurylǵan kúninen bastap ansambl halyqaralyq, respýblıkalyq, oblystyq jáne qalalyq baıqaýlardyń laýreattary atanyp úlgergen.
Ansambl quramynda 21 bala bar, onyń 18-i – patronattyq tárbıede. О́mirhan Jetesov pen Amangúl ónerge jaqyn jandar bolǵan soń, baýyryna basqan árqaısysyn erekshe qamqorlyq pen meıirimdilik tanyta otyryp, olardy mýzyka men ónerge baýlydy. Búginde balalardyń biri dástúrli án oryndasa, biri dombyra, qobyz tartady, endi biri jetigen, sybyzǵy jáne ózge de aspaptarda sheber oınaıdy. Otbasy múshelerinen quralǵan otbasylyq ansambl qazir kópshilikke tanymal. Atalǵan is-sharaǵa Nur-Sultan qalasy «Bilim jańǵyrtý» ortalyǵynyń ókilderi, oqýshylar jáne ata-analar, bilim berý uıymdarynyń ustazdary qatysty.
«Elordamyzdaǵy Mahambet О́temisov atyndaǵy Oqýshylar saraıynda respýblıkamyzda ótip jatqan bıylǵy Balalar jylyna oraı «Elorda Bıler qoǵamy», qalalyq bilim basqarmasy, «Bilim jańǵyrtý» ortalyǵy, №1 balalar mýzyka mektebiniń uıymdastyrýymen, sonaý Aqtóbeden arnaıy kelgen Jetesovter otbasylyq konserti úlken deńgeıde ótti. Ine shanshar oryn joq, zaldaǵy toly kórermenniń zor yqylas, rızashylyǵyna bólendi dese artyq aıtqan bolmas. О́zderiniń úsh balasymen qosa 18 balany (ózge ulttardan da bar) ulttyq tárbıege, onyń ishinde ónerge baýlyp, sonyń bıik shyńyna shyǵarý árkimniń qolynan kelmes. Mine, osyndaı batyr otbasyny arnaıy quttyqtaýǵa Parlament depýtaty, «Aq jol» partııasynyń múshesi, aqyn Qazybek Isanyń kelip quttyqtap, partııa atynan 21 balanyń ákesi О́mirhannyń keýdesine tósbelgi taǵýynyń ózi atalǵan ónerpaz otbasyǵa úlken qurmet boldy», deıdi uıymdastyrýshylar.
