Keıingi eki-úsh jyldyń ishinde barlyq memleket pandemııa jaǵdaıynda ómir súrip, óz elderinde ótetin túrli halyqaralyq jarysty keıinge shegerip tastady. Sonyń saldarynan sportshylar kóp jaǵdaıda tek el ishindegi birinshiliktermen shektelýge májbúr boldy. Sondyqtan bokstan ulttyq quramanyń bas bapkeri Qaırat Sátjanov osy týrnırde byltyrǵy el chempıonatynda jartylaı fınalǵa deıin jetken barlyq boksshyǵa ózin kórsetýge múmkindik berdi. Sóıtip, «Elorda kýbogynda» erler arasynda Qazaqstannyń 54 boksshysy synǵa tústi. Sonyń ishinde 16-sy fınaldyq aıqasqa joldama aldy. Árıne, jerebege baılanysty keıbir salmaq dárejelerinde qazaqstandyq boksshylar bir-birimen erte jolyǵyp, jartylaı fınal, fınal joldamalaryn ózara sarapqa salýǵa týra keldi. Al tuńǵysh ret uıymdastyrylǵan týrnırdiń fınalyna byltyrǵy álem chempıonatynyń jeńimpazdary Temirtas Júsipov (48 kg) pen Sáken Bıbosynov (51 kg), kúmis júl-
degeri Mahmud Sabyrhan (54 kg) men Serik Temirjanov (57 kg), aǵaıyndy-egizder Samatáli (60 kg) men Sanatáli Tóltaevtar (63,5), Nurbek (80 kg) pen Aıbek Oralbaı (91 kg) syndy tájirıbeli boksshylar joldama aldy. Sondaı-aq fınalda Kýbanyń – tórt, О́zbekstannyń – úsh, Qytaıdyń – úsh, Japonııanyń bir boksshysy óner kórsetti.
Fınaldyq jekpe-jektiń tusaýkeser kezdesýinde jeńil salmaqtaǵy álem jáne Azııa chempıony, Qazaqstan birinshiliginiń bes dúrkin jeńimpazy Temirtas Júsipov pen ózbekstandyq jas boksshy Asylbek Jalılov judyryqtasty. Úsh raýndqa jalǵasqan jekpe-jekte talaı dodalarda dara shyqqan tájirıbeli jerlesimiz 4:1 esebimen esh qıyndyqsyz jeńiske jetti. Sóıtip, Júsipov el qorjynyna týrnırdegi alǵashqy altyn júldeni saldy.
Qazaqstandyq boksshylardan ekinshi bolyp sharshy alańǵa shyqqan 51 kıloda álem chempıony, Tokıo Olımpıadasynyń qola júldegeri Sáken Bıbosynov Kýbanyń jas qabylany Alehandro Klara Fıssýrmen bas júldeni sarapqa saldy. Asa tartysty ótken básekede jerlesimizdiń baǵy jandy.
Sondaı-aq 54 kılo salmaqta álem chempıonatynyń kúmis júldegeri, elimizdiń talantty boksshysy Sabyrhan Mahmud qytaılyq Bo Fangtan 5:0 esebimen basym túsip, tuǵyrdyń bıik satysynan kórindi. Al 57 kılo salmaqtyń fınalynda álem chempıonatynyń kúmis júldegeri Serik Temirjanov kýbalyq Osvel Kabaleronyń osal tusyn taba bildi – 3:2.
60 kılo salmaqta qazaqstandyq eki boksshy – Samatáli Tóltaev pen Talǵat Syrymbetov jankúıerlerge tamasha boks jekpe-jegin syılady. S.Tóltaev jastar arasyndaǵy Azııa chempıony, osy salmaqtaǵy 2020 jylǵy el birinshiliginiń jeńimpazy sanalsa, T.Syrymbetov byltyr 54 kılo salmaqta top jarǵan bolatyn. Fınalda ol tájirıbeli boksshy Oljas Baınııazovtan basym túsken-di. Jarty jyldyń ishinde alty kılo salmaq qosqan Talǵat jańa salmaqty jatsynbaı, fınalǵa erkin jetti. Alaıda sońǵy jekpe-jekte 60 kılonyń «qojaıyny» Tóltaevty jeńýge shamasy jetpedi.
Samatáliniń izin ala rıngke syńary Sanatáli shyqty. 63,5 kılo salmaqta synǵa túsken ol egiziniń jeńisti jolyn jalǵaı almady. Shoqyr Bóltekuly týrnıriniń qola júldegeri Muhamedsabyr Bazarbaıuly fınalda aǵaıyndy Tóltaevtarǵa eki salmaqta top jarý múmkindigin bermedi. Úsh raýndta da myqtylyq tanytqan Muhamedsabyr 5:0 esebimen jeńiske jetti. Al 67 kılo salmaqtyń fınalynda byltyrǵy el chempıony Dýlat Bekbaýov pen 63,5 kılodaǵy kúmis júldeger, jastar arasyndaǵy Azııa chempıony Abzal Serik judyryqtasyp, ekinshisi altynnan alqa taǵyndy – 4:1.
«Jekpe-jek» sport saraıyna jınalǵan jankúıerler 71 kılo salmaqtaǵy boksshylardyń jekpe-jegin qyzyǵa tamashalady. Bul salmaqta Qazaqstan chempıonatynyń eki dúrkin jeńimpazy, Azııa oıyndarynyń kúmis júldegeri jerlesimiz Aslan Shymbergenov pen 2021 jyly Serbııada ótken álem chempıonatynyń jeńimpazy japonııalyq Sevon Okazava aıqasty. Belgradtaǵy dodanyń jartylaı fınalynda Abylaıhan Júsipovti qapy qaldyrǵan japon boksshysy bul joly Aslanbekten aılasyn asyra almady. О́te saýatty judyryqtasqan otandasymyz úsh raýndta da aıqyn basymdyqqa ıe bolyp, tóreshilerge bura tartatyndaı múmkindik qaldyrmady – 4:1.
О́kinishke qaraı, 75 kılo salmaqta birde-bir boksshymyz fınalǵa shyǵa almady. Aldaǵy ýaqytta dál osy salmaq bas bapker Qaırat Sátjanovtyń bas aýrýyna aınalatyn túri bar. Sebebi keıingi jyldary bul salmaqta júldeniń aýyly alystap ketti. Týrnırdiń jartylaı fınalynda byltyrǵy Qazaqstan chempıony Nurqanat Raıys álem chempıony kýbalyq Ionlıs Martıneske ese jiberse, el birinshiliginiń kúmis júldegeri Aıatolla Tákijanov ózbekstandyq Saıdjamshıd Jafarovtan jeńilip qaldy. Al bul salmaqta bas júlde kýbalyq Ionlıs Martıneske buıyrdy.
80 kıloda jastar arasyndaǵy álem chempıony, Qazaqstan birinshiliginiń jeńimpazy Nurbek Oralbaı da elordadaǵy týrnırde óz myqtylyǵyn dáleldedi. Fınalda ol qytaılyq boksshy Tanglatıhan Erbıekemen kezdesip, úsh raýndta 3:2 esebimen jeńiske jetti. Alǵashqy eki raýndta otandasymyz aıqyn basymdyqpen alda turǵan edi. Sońǵy raýndta qytaılyq boksshy jekpe-jek tizginin óz qolyna alyp, belsendi bolǵanymen, báribir jeńiske jete almady. Aýyr salmaqta (91 kılo) elishilik, halyqaralyq týrnırlerdiń jeńim-
pazy men júldegeri, áskerıler arasynda álem chempıony atanǵan Abzal Quttybekov alǵash ret 86 kılo salmaqta óner kórsetip, birinshi altyn júldesine qol jetkizdi. Otandasymyz fınalda kýbalyq Iаner Areomen kezdesip, úshinshi raýndta nokdaýn alyp qalǵanyna qaramastan tóreshilerdiń aralas daýysymen basym tústi – 3:2.
Araǵa bir jekpe-jek salyp, 80 kıloda top jarǵan Nurbektiń syńary, jastar arasyndaǵy Olımpıada chempıony Aıbek Oralbaı 91 kıloda sharshy alańǵa kóterilip, bir otbasyǵa qos qýanysh syılady. Asa tartysty ótken fınaldyq aıqasta Aıbek jastar arasyndaǵy Azııa chempıony túrkistandyq Saǵyndyq Toǵambaıdy jeńdi. Eki boksshy da keıingi jyldary kóp básekede bir-birine laıyqty qarsylas atanyp júr. Biraq ázirge barlyq jarysta Aıbektiń mereıi ústem bolýda.
Fınaldyq jekpe-jektiń núktesin asa aýyr salmaqta synǵa túsken qazaqstandyq Damır Toıbaı men ózbekstandyq Lazızbek Mýllajanov qoıdy. Jastar arasynda óreli ónermen mamandar kózine túsken Damır eresekter dýyna qosylǵaly beri halyqaralyq iri jarystarda jeńis tuǵyrynan kórine almaı keledi. Ol bul jolǵy fınalda da qarsylasynyń osal tusyn taba almaı, altyn júldege synyq súıem qalǵanda súrindi. О́zbekstandyq boksshy tóreshilerdiń biraýyz sheshimimen jeńiske jetti.
Osylaısha, elordada alǵash ret uıymdastyrylǵan halyqaralyq týrnır óz máresine jetti. Ulttyq qurama boksshylary 13 salmaqtyń 11-inde altyn medal oljalap, jalpykomandalyq esepte top jardy. Keıingi oryndarǵa Kýba jáne О́zbekstan boksshylary ıe boldy. Al Tokıo Olımpıadasynyń qola júldegeri Sáken Bıbosynov týrnırdiń eń úzdik boksshysy atandy. Aıta keteıik, jarys qorytyndysy boıynsha jeńimpaz jáne júldeger atanǵan boksshylarǵa qarjylaı syıaqy tabystaldy.
