Bıylǵy jyldyń «Barysy» – Isaǵabylov

Bıylǵy jarystyń qurmetti qonaq­tary retinde Nur-Sultan qalasynyń ákimi Altaı Kólginov, Mádenıet jáne sport mınıstrligi Dene shynyqtyrý jáne sport komıtetiniń tóraǵasy Samat Erǵalıev, «Qazaqtelekom» AQ basqarmasynyń tóraǵasy Qýanyshbek Esekeev quttyqtaý sóz sóılep, balýan­darǵa sáttilik tiledi.

On birinshi ret uıymdastyrylǵan týrnırde jankúıerler 2021 jylǵy «Qazaqstan barysy» Dáýren Nura­lınov pen osy týrnırdiń 2013 jáne 2019 jyldarǵy jeńimpazy Aıbek Nuǵy­marovtyń ónerin tamashalaı almady. Dáýren jaraqatyna baılanysty bıylǵy dodaǵa qatyspasa, Aıbek sporttyq jolyn aıaqtaǵanyn resmı túrde jarııalady. Taǵy bir aıta keterligi, keshegi jarys barysynda Aıbek Nuǵymarovqa «Álem barysy» týrnıriniń bas júldesi resmı túrde tabystaldy. Sebebi 2019 jylǵy qazaq kúresinen ótken «Álem barysy» týrnıriniń fınalynda Aıbekti jeńgen reseılik balýan Roman Bobıkovtiń qan synamasynan tyıym salynǵan «metılgeksımın» preparaty tabylǵany belgili boldy. Sóıtip, jeńis avtomatty túrde otandasymyzǵa berildi. Qazaq kuresi Assosıasııasynyń ókili Aıbek Nuǵymarovqa jankúıerlerdiń kózinshe altyn belbeýdi qaıtaryp berdi.

Sondaı-aq uıymdastyrýshylar jyl saıyn balýandar básekesin tartysty, jankúıerlerge qyzyqty etý úshin jarys erejesin jetildirip, ózgerister engizip otyratyny belgili. Máselen, aldyńǵy jyldary balýandardyń kıimine ózgeris engizdi. Iаǵnı kúrtesheniń jeńi qysqaryp, shalbardyń balaǵyn uzartty. Keıinnen ýaqyt jaǵyn tıimdi paıdalaný úshin  beldesýler ýaqytyn bes mınýttan
4 mınýtqa qysqartty (bıyl beldesý ýaqyty qaıtadan uzartyldy). Jańa bozkilem tóselgen soń balýandar byltyrdan bastap jalańaıaq kúresetin boldy. Al bıyldan bastap «búk» upaıy jarys erejesinen alynyp tastaldy. Iаǵnı buǵan deıin balýan ádis jasaǵanda qarsylasynyń tizesi jerge tıip ketkende – «búk» upaıy beriletin. Sondaı-aq burynǵy ereje boıynsha 3 «búk» upaıy bir jambas upaıyna teń bolatyn. Endi bıyldan bastap balýandar «búk» upaıyn­syz beldesti. Bul ózgerister týr­nırdiń kórigin qyzdyrmasa, esh kemitken joq.

Bula kúshi boıyna syımaı tur­ǵan 36 balýan «á» degennen tartys­ty beldesýimen «Barys Arena» sport keshenine jınalǵan jáne teledıdar arqyly tamashalaǵan myń­daǵan jankúıerdiń delebesin qozdyrdy. Saıdyń tasyndaı iriktelgen kil myqty balýandar jınalǵan bıylǵy jarysta myna balýan jeńimpaz atanady degen naq­ty bir favorıt joq edi. Al shırek fınal básekelerinen keıin bıyl jańa «barystyń» esimi anyqtalatyny belgili boldy. Sebebi osyǵan deıingi jarystarda jeńis tuǵyrynan kóringen Muhıt Tursynov, Elaman Erǵalıev, «Ásker barysy» atanǵan Erasyl Qajybaev sekildi apaıtós balýandar shırek fınaldan árige asa alǵan joq.

Sóıtip, birinshi jartylaı fınalda byl­tyr­ǵy kúmis júldeger Ǵalymjan Qy­ryq­baı men Maqsat Isaǵabylov beldesti. Bul báse­kede kópshilik Jambyl oblysynan kelgen balýannyń jeńisine senimdi bolǵan. Alaı­da kezdesý qyzylordalyq balýannyń jeńisimen aıaqtaldy. Ekinshi jartylaı fınalda 2017 jylǵy «barys» Elaman Er­ǵa­lıevti jarys jolynan yǵystyrǵan shym­kenttik Nursát Temirhan mańǵystaýlyq Nur­­dáýlet Jarylǵapovtan aılasyn asyra almady.

Sonymen qazaq kúresinen eń myqty balýandy anyqtaıtyn sət te kelip jetti. Alty saǵatqa sozylǵan aıtýly básekeniń fınalyna týrnırde bir demmen kúresip, óziniń naǵyz sporttyq babynda ekenin tanytqan Maqsat Isaǵabylov pen Nurdáýlet Jarylǵapov shyqty. Buǵan deıingi jarystarda birde-bir ret fınalǵa shyqpaǵan eki balýannyń arasyndaǵy fınaldyq beldesý nebári eki-aq mınýtqa sozyldy. Alǵashqy mınýttarda eki balýan da bir-birin ańdysyp, ádis jasaýǵa bata almaı júrdi. Alaıda bel­de­sýdiń ekinshi mınýty aıaqtalar tusta qy­zyl­ordalyq balýan birinshi bolyp ádis jasap, qarsylasyn taza jeńispen qapy qaldyryp ketti. Sóıtip, Maqsat Isaǵabylov «Qazaqstan barysy» týrnıriniń segizinshi jeńimpazy atandy. Sondaı-aq «barysta» baǵy janǵan úshinshi qyzylordalyq ba­lýan retinde tarıhta qaldy. Buǵan deıin Syr eliniń balýandarynan 2011 jyly Ulan Rysqul jáne 2017 jyly Elaman Erǵalıev top jarǵan bolatyn.

Úshinshi oryn úshin Nursát Temirhan men Ǵalymjan Qyryqbaı beldesýge tıis edi. Alaıda N.Temirhan jaraqatyna baılanysty bozkilemge shyǵýdan bas tartyp, qola júlde Ǵ.Qyryqbaıǵa buıyrdy.

Týrnır qorytyn dysy boıynsha, 2022 jylǵy «Qazaqstan barysy» atanǵan Maq­sat Isaǵabylovtyń beline «Altyn bel­beýdi» Premer-Mınıstrdiń orynbasary Eraly Toǵjanov baılady. Sonymen qatar qyzylordalyq balýanǵa aýyspaly «Altyn taıtuıaq» pen 25 mln teńgeniń sertıfıkaty tabys etildi. Budan bólek, týrnır­de kúmis júldeger atanǵan Nurdáýlet Jaryl­ǵapovqa «Kúmis belbeý» men 5,5 mln teńge syılyq tapsyryldy. Al úshinshi oryn ıelengen Ǵalymjan Qyryqbaıǵa 1,8 mln teńge jáne «Qola belbeý» tapsyryldy.