AKADEMIIаNYŃ AQTО́BEDEGI TUSAÝKESERI

Oblys ákimdiginde Prezıdent janyndaǵy Memlekettik  bas­qa­rý akademııasynyń  kóshpeli ta­nys­tyrylymy bolyp ótti. Oǵan mem­lekettik qyzmetshiler, aýdandar ákimderiniń apparat jetekshileri qatysty. Akademııa jáne onyń qurylymdary týraly beınefılm kórsetildi. Sodan keıin  Prezıdent janyndaǵy Memlekettik basqarý akademııasy saıası-qoǵamdyq prosester men tehnologııalar kafedrasynyń meń­gerýshisi, fılosofııa ǵylym­da­rynyń doktory, professor Marat Bıekenov  joǵarǵy oqý orny jáne qandaı maman­dyq­tarǵa daıarlaıtyny, oqytý sa­pasy, kimder sabaq beretini ja­ıyn­da áńgimeledi . Onyń aıtýynsha,  Prezıdent janyndaǵy Memlekettik basqarý akademııasy memlekettik qyzmetshilerdi, atap aıtqanda, dıplomatııalyq qyzmet pen sot júıesi úshin mamandar daıarlaý, qaıta daıarlaý jáne biliktiligin arttyrý baǵdarlamalaryn iske asyratyn negizgi ǵylymı, ádistemelik jáne bilim berý ortalyǵy bolyp tabylady. Munda  dáris oqıtyn 69 oqytýshynyń 28-i ǵylym doktory, 39-y ǵylym kandıdaty eken. Akademııa qurylǵannan beri 400-den astam ákimshilik jáne saıası memlekettik qyzmetshilerdi daıarlapty. Qaıta daıarlaý jáne biliktilikti arttyrý kýrstarynan  14000-ǵa jýyq adam ótken. Akademııa túlekteriniń 10 paıyzy mınıstrlikterge, 40 paıyzy Joǵarǵy Sot júıesine jumysqa ornalassa, 27 paıyzynyń qyzmettik laýazymy ósken, 100-den astamy “Bolashaq” baǵdarlamasy boıynsha oqýǵa túsken.  Prezıdent Ákimshiliginde, Úkimette, ortalyq jáne jergilikti memlekettik  basqarý organdarynda jumys isteıdi, olardyń ishinde  mınıstrler, vıse-mınıstrler,  memlekettik vedomstvolar basshylary bar. Magıstratýra  men aspırantýra baǵdarlamalary boıynsha oqýdy aıaqtaǵandar memlekettik tapsyrys negizinde memlekettik laýazymǵa konkýrstan tys ornalasýyna quqyǵy bar eken. Tanystyrylym kezinde Marat Bıekenov oqýǵa múddeli memlekettik qyzmetshilerge akademııanyń materıaldyq-tehnıkalyq bazasymen, bilim berý  baǵdarlamalarymen, qabyldaý erejesimen jáne oqý merzimderimen, oqýǵa túsýshilerge qoıylatyn talaptary jaıynda, mol aqparat berdi. Satybaldy SÁÝIRBAI, Aqtóbe oblysy.