D tobynda Sırııa, Bahreın jáne Iran quramalarymen synǵa túsken Oleg Kıselev shákirtteri alty matchtyń beseýinde jeńiske jetip, tek sońǵy týrda Bahreınge ese jiberdi. Elordadaǵy «Saryarqa» velotreginde ótken oıynda qonaqtar 62:51 esebimen basym tústi. Qazaqstan quramasy sońǵy týrda jeńilgenine qaramastan óz tobynda 1-oryn alyp, irikteýdiń 2-aınalymyna joldama aldy. Álem kýbogynyń ekinshi irikteý kezeńinde qazaqstandyq basketbolshylar Bahreın, Iran, Aýstralııa, Qytaı jáne Japonııa quramasymen joldamany sarapqa salady. Alǵashqy úsh oryndaǵy quramalar Álem kýbogyna qatysady. Irikteý oıyndary tamyz, qarasha jáne 2023 jyldyń aqpanynda ótedi dep josparlanǵan.
Aıta keteıik, basketboldan 2023 jylǵy Álem kýbogy 25 tamyz ben 10 qyrkúıek aralyǵynda birden 3 memlekette – Indonezııa, Japonııa jáne Fılıppınde uıymdastyrylady. Qazaqstan quramasy 2019 jylǵy Álem kýbogynyń ekinshi irikteý kezeńine ótkenimen, fınaldyq saıysqa joldama ala almaǵan edi.
