«Kóp kezeńdi jedel is-sharalar sheńberinde 2-3 maýsymda Almaty qalasynda «alfa-PVP» esirtki zatynyń 17,7 kelisin tasymaldaý jáne saqtaý kezinde esirtki qylmysyna qatysty toptyń 4 kómekshisi ustaldy. Ustalǵandardyń biriniń turǵylyqty mekenjaıy boıynsha psıhotroptyq zattardy óndiretin jerasty zerthana tabyldy. Esirtki kontrabandalyq jolmen Qyrǵyzstanǵa jiberýge, sondaı-aq Shymkent jáne О́skemen qalalarynda satýǵa arnalǵan bolyp shyqty. Qylmystyq toptyń baılanystaryn joıý úshin Ulttyq qaýipsizdik komıteti Qyrǵyzstannyń IIM-men ózara is-qımyldy iske asyrdy. Nátıjesinde, 5 maýsymda Bishkek qalasynda jasyryn jerden 3 keli esirtki zatyn alý kezinde Qyrǵyzstannyń 3 azamaty ustaldy. Arnaıy operasııanyń sońǵy kezeńi О́skemen jáne Shymkent qalalaryndaǵy birmezgilde 3 esirtki kýreriniń ustalýymen aıaqtaldy. Olardy tekserý barysynda 2 keli esirtki tabyldy», delingen Komıtet habarlamasynda.
Operasııa barysynda esirtki qylmysyna qatysy bar 10 adam ustalyp, iri esirtki zerthanasynyń jumysy toqtatyldy.
Tárkilengen esirtkiniń jalpy salmaǵy – 22,7 keli (68 myń bir rettik dozaǵa teń).
Atalǵan faktiler boıynsha sotqa deıingi is-sharalar júrgizilip jatyr.
