Qazaqstandyq tennısshi jartylaı fınalda álemniń burynǵy birinshi raketkasy, «Úlken dýlyǵa» týrnıriniń eki márte chempıony (Fransııa ashyq chempıonaty – 2018, Ýımbldon – 2019), qazirgi kezde reıtıngide 18-satyda turǵan rýmynııalyq Sımona Haleppen kezdesti.
Qarsylastar osyǵan deıin ózara úsh ret oınap, sonyń ekeýinde S. Halep jeńiske jetken edi. Bul joly E. Rybakına birinshi partııany qarqyndy bastap, 3:0 esebimen alǵa shyqty. Osy basymdylyǵynan aıyrylǵan joq – 6:3. Elena ekinshi sette de 2:0 esebimen alǵa ketkenimen, Sımona sol boıda tarazy basyn teńestirip úlgerdi – 2:2. Degenmen, qazaqstandyq sportshy qaıta breık jasap, óz geımin aldy – 4:2.
Sodan keıin matchty taǵy bir breıkpen támamdady – 6:3. Bir saǵattan astam ýaqytqa sozylǵan báseke barysynda Elena 5 eıs jasap, 9 breık-poınttyń úsheýin múlt jibermedi. Osylaısha, E. Rybakına qazaqstandyq tennısshiler arasynan tuńǵysh ret Ýımbldon jarysynyń fınalyna ótti.
Bul – teńdessiz tabys. Elena Rybakına Ulybrıtanııa ashyq chempıonatynyń fınalynda álemniń 2-raketkasy, týnıstik Ons Jabermen bas júldeni sarapqa salady. O. Jaber jartylaı fınalda álemdik reıtıngide 103-orynda turǵan germanııalyq Tatıana Marııany 6:2, 3:6, 6:1 esebimen tize búktirgen bolatyn.
