Sýretshi Qalılolla Ahmetjan shyǵarmashylyq izdenis jolynda ımpressıonızmnen bastap, japondyq grafıkanyń tehnıkasyna deıin san alýan baǵytty qamtydy. О́zine erekshe unaǵany HIH ǵasyrda Fransııa elinde qarqyndy damyǵan «pýantılızm» stıli. Sol stılde jazǵan shyǵarmalary óziniń erekshe sezimtaldyǵymen, názik ári taza móldirligimen oqyrmandy birden baýrap aldy. Bul onyń «Tolqyn shashyp shapqan at» týyndysynda kórinis tapqan.
Dál osy týyndylarda sýretshi tabıǵattyń bastapqy sulýlyǵy men shynaıylyǵyn saqtap qalǵandaı. Qalamger shyǵarmashylyǵynyń basty taqyrybyn máńgilik shabyt kózine arnaıdy. Sol álemde ózi erkin qalyp demalady, tynyshtyqpen jalǵyz úndesedi, armany júırikteı alysqa shabady. Onyń beınelegen tabıǵatynyń árbir kórinisi, jazyq dala, orman, taý bókteri, júırik tulpar bolsyn erekshe mahabbatqa toly. Qoldanǵan tústeriniń qosyndysy bir-birimen úılesim taýyp, tepe-teńdigin saqtaı kele, jaryq pen kóleńkeniń aıyrmashylyǵyn ońaı sheshedi.
Formany izdestirý nátıjesinde qylqalam ıesi ózine ǵana tán keskindemelik tehnıkasyn qurastyrdy. Sýretshiniń negizgi qyzyǵýshylyǵy, qozǵaýshy kúshi men kenepteriniń basty ózgesheligi – tús pen forma. Sol arqyly kompozısııaǵa erekshe jaryq beredi.
Negizinen qylqalam sheberiniń beıneleý stılıstıkasy fransýz keskindemesin eske túsiredi. Dese de ol basqa janrlarmen qazaq sándik-qoldanbaly ónerin biriktirý arqyly ortaq kompozısııa jaza aldy. Olar názik gamma arqyly erekshelenedi. Tús arqyly keńistik pen jaryqtyń, boıaýlardyń qaıtalanýy shashyrańqy bolǵanymen, shyǵarmada birtutastylyq, úılesimdilik joǵalmaıdy.
