Bar másele qarymta matchta sheshiledi

Shveısarııanyń Non qala­synda tartylǵan Chempıondar lıgasynyń jerebesinde Qos­ta­naıdyń «Tobyly» birinshi aınalymda «Ferensvaroshqa» tap bolǵannan keıin, mamandar bul juptyń favorıti retinde birden Majarstan chempıonyn atady. О́ıtkeni «Ferensvarosh» «Tobylǵa» qaraǵanda jyl saıyn Eýrokýbok básekeleriniń top­tyq kezeńinde óner kórsetip, Eýro­panyń azýly komandalarymen oınap júrgen tájirıbeli komanda retinde tanymal. Al «Tobyldyń» jaǵdaıy bárine belgili. Keıingi eki jylda «Je­ness» (Lıýksembýrg), «Jılına» (Slovakııa) sekildi bıýdjeti az, jartylaı kásipqoı komandalardan jeńilip, uıatty bolǵan edi.

Sóıtip, «Tobyl» men «Ferens­varosh» arasyndaǵy eki oıyn­nyń negizgi favorıti sanalǵan majarastandyq klýb alǵashqy matchty syrt alańda ótkizip, teń nátıjege qol jet­kizgenine qat­ty qýandy. Eń keıingi resmı kez­desýin osydan eki aı buryn ótki­zip, maý­sym aıynda 4-5 márte jol­das­tyq kezdesýde alańǵa shyqqan fýt­bolshylardyń demalys­tan keıin jasyl alańdy jatyr­qap qalǵany birden baıqaldy. Sondyqtan da olar úshin teń nátıjeniń ózi úlken olja boldy.

«Tobyl» úshin mundaı oıynda teń nátıje kórsetý – jeńi­lispen para-par ekeni aıtpa­saq ta túsinikti. О́ıtkeni Majar­standa ótetin qarymta kezde­sýde «Ferensvarosh» óz jankúıer­leriniń aldynda budan da jaqsy oınaýǵa tyrysady. Keshegi match­ta «Tobyl» fýtbolshylary qa­rymta kezdesýdiń aldynda-aq bar máseleni sheship tastaıtyn­daı jaǵdaıda bolǵan edi. Alaı­da qostanaılyq fýtbolshy­lar gol soǵatyn birneshe múmkindiktiń birde-birin tıimdi paıdalana almady. Atap aıtar bolsaq, kezdesýdiń 14-mınýtynda «Tobyldyń» serbııalyq legıoneri Zoran To­shıchtiń aıyp alańynan tepken dobyn qarsylastyń oıynshysy qaqpa syzyǵynan qaıtaryp, komandasyn goldan qutqaryp qaldy.

Sondaı-aq matchtyń 26-mınýtynda Ashat Taǵybergende de esepti ashatyn múm­kindik boldy. Biraq onyń tepken doby qaqpa mańdaıshasynan sál bıik ketti. Keıinnen dál sondaı urymtal sátte por­tý­galııalyq legıoner Rýben Brıjıdý de gol soǵa almady. Bir aıta keterligi, keshegi match­ta «Tobyl» sapynan alańda bes legıoner jáne qazaqstandyq alty fýtbolshy óner kórsetse, «Ferensvarosh» klýbynda ma­jar­standyq úsh fýtbolshydan basqasynyń bári sheteldik oıynshylar boldy.

Ekinshi taımda da «Tobyl» fýt­bolshylary qarsylas koman­danyń oıynshylaryna qaraǵanda belsendi qımyldap, gol soǵýdyń túrli aıla-tásilin qarastyrdy. Biraq «Ferensvaroshtyń» táji­rıbeli qorǵaýshylary men qaqpashysy 90 mınýt boıy saýatty qorǵanyp, bizdiń jigit­terge gol soqtyrǵan joq. Ekin­shi taımda bir ǵana Ashat Taǵy­ber­gende óz atyn tabloǵa jazdyrtatyn bir emes, úsh múmkindigi boldy. Biraq bul kezdesýde jartylaı qorǵaýshyǵa gol soǵý baqyty buıyrmaǵan eken.

Qarsylas komandanyń oıynshylary kóbine qarsy shabýylǵa ıek artyp, Aleksandr Mokın qorǵaǵan qaqpadan sańylaý tabýǵa tyrysyp kórdi. Biraq jýyrda ǵana 41 jasqa tolǵan tájirıbeli qaqpaqshy oıyn barysynda birneshe seıv jasap, qaqpasyna gol ótkizgen joq. Osylaısha, Qostanaıda ótken eki komanda arasyndaǵy alǵashqy oıynda esep ashylmady – 0:0. Endi barlyq másele bir aptadan soń Majarstan asta­nasynda ótetin qarymta kez­desýde sheshiledi. Match 14-inen 15-ine qaraǵan túni Býda­peshttegi 22 myń jankúıer syıatyn «Groýpama Arena» stadıonynda ótedi.