Prezıdent Jarlyǵynyń jobasynda «B» korpýsyndaǵy memlekettik qyzmetshilerdiń jumysyn retteýge qatysty normalarǵa ózgertý engizý usynylǵan.
Qujattyń tolyq ataýy – «Memlekettik qyzmet ótkerýdiń keıbir máseleleri týraly» Qazaqstan Respýblıkasy Prezıdentiniń 2015 jylǵy 29 jeltoqsandaǵy № 152 Jarlyǵyna ózgertýler men tolyqtyrýlar engizý týraly Jarlyq jobasy.
Qujat jobasymen birge usynylyp otyrǵan ózgerister men qoldanystaǵy normalardyń salystyrmaly kestesi berilgen. Sol kestege sáıkes, qoldanystaǵy Jarlyqtyń 33-tarmaǵyna kelesi ózgeris engizý usynylyp otyr:
Qazir «B» korpýsy qyzmetshileriniń jumysyn baǵalaýdyń 4 deńgeıli shákili (shkala – red.) belgilengen – «qanaǵattanarlyqsyz», «qanaǵattanarlyq», «tıimdi», «óte jaqsy». Mundaǵy jerde 4 deńgeıdiń mazmuny naqtylana túspek. Dálirek aıtsaq, «Laýazymdyq mindetterin tıimdi atqarady», «Laýazymdyq mindetterin tıisti túrde atqarady», «Laýazymdyq mindetterin qanaǵattanarlyq deńgeıde atqarady», «Laýazymdyq mindetterin qanaǵattanarlyqsyz deńgeıde atqarady» degen baǵalaý deńgeıleri engiziledi.
Qoldanystaǵy Jarlyqtyń 35-tarmaǵynda «B» korpýsy qyzmetshileriniń qyzmetin baǵalaýdyń nátıjeleri olardyń qyzmettik tizimderine engiziletini aıtylǵan. Usynylyp otyrǵan tártip boıynsha bul tarmaq alynyp tastalmaq, ıaǵnı «B» korpýsy qyzmetshileriniń qyzmetin baǵalaýdyń nátıjeleri olardyń qyzmettik tizimderine engizilmeýi múmkin.
Qazirgi tańda tártiptik jazaǵa tartylǵan memlekettik saıası qyzmetshi jańa teris qylyq jasamasa jáne ózin adal qyzmetker retinde kórsetse, tártiptik jaza alty aı ótkenge deıin alynýy múmkin.
Usynylatyn jobada bul tártipke qosymsha talap engizilmekshi, ıaǵnı memlekettik saıası qyzmetshilerge oryndamaǵany nemese tıisinshe oryndamaǵany úshin tártiptik jazalar qoldanylǵan kezde Qazaqstan Respýblıkasy Prezıdentiniń, Qazaqstan Respýblıkasy Prezıdenti Ákimshiligi Basshysynyń jáne onyń orynbasarlarynyń tapsyrmalary boıynsha olardy merziminen buryn alyp tastaý Qazaqstan Respýblıkasy Prezıdenti Ákimshiliginiń kelisimi boıynsha júrgiziledi.
Sondaı-aq jańa qujat aıasynda memlekettik qyzmetshilerdiń rotasııalaý merzimi men rotasııaǵa jatatyn qyzmetshilerdiń sanattaryn keńeıtý kózdelip otyr.
Jarlyq jobasynyń tolyq mátini Ashyq NQA saıtyna ornalastyrylǵan. Qujat 22 shildege deıin kópshilik talqylaýynda bolady.
