13-22 maýsym aralyǵynda óz páterin satqan Almaty turǵyny alaıaqtardyń arbaýyna túsip qalǵan. Ol birneshe transhpen satylymnan túsken 23 mıllıon teńgeni alaıaqtardyń shottaryna aýdarǵan. Aldanyp qalǵanyn túsingen jábirlenýshi 24 maýsymda quqyq qorǵaý organdaryna júgindi.
Atalǵan faktige baılanysty Almaty qalasy Almaly aýdanynyń PB Qazaqstan Respýblıkasy QK 190-babynyń 4-bóliginde (Asa iri mólsherdegi alaıaqtyq) kózdelgen qylmystyq quqyq buzýshylyq quramynyń belgileri boıynsha sotqa deıingi tergeý bastady.
Sol kúni tergelip jatqan is aıasynda IIM Krımınaldyq polısııa departamenti men Almaty PD asa tájirıbeli qyzmetkerlerinen arnaıy jedel-tergeý toby quryldy.
Jedel-izdestirý jáne tergeý is-sharalary barysynda alaıaqtyq áreketterde Qazaqstannyń ártúrli qalalarynda turatyn jalǵan tulǵalarǵa resimdelgen 10-ǵa jýyq bank kartalary paıdalanylǵany anyqtaldy.
Qazaqstan Respýblıkasy IIM kıberqylmyspen kúres bólimshesiniń jedel ýákilderi Pavlodar oblysy jáne Almatydaǵy áriptesterimen birge Qazaqstan men Reseı azamattarynan turatyn qylmystyq topty ustady. Olar ınternet arqyly alaıaqtyq jasady degen kúdikke ilingen.
Bes qatysýshyǵa qatysty qamaýǵa alý bultartpaý sharasy tańdaldy. Qazir top qatysýshylarynyń ınternet-alaıaqtyqtyń alty epızodyna yqtımal qatystylyǵy anyqtaldy, keltirilgen shyǵyn 106 mıllıon teńgeden asty.
Ádette mundaı qylmystardy jasaýda úshinshi tulǵalarǵa resimdelgen banktik shottar men kartalar qoldanylady, qarajatty qolma-qol aqshaǵa aınaldyrý úshin jalǵan adamdar qoldanylady. Qońyraýlar úshin alaıaqtar abonenttik nómirlerdi aýystyrý boıynsha baǵdarlamalardy paıdalanady.
Bul áreketterdiń barlyǵy yqtımal qurbandardyń banktik kartalary men depozıtterine qol jetkizýge, odan ári olardan aqsha aýdarýǵa nemese nesıe alýǵa baǵyttalǵan.
