Senator Sergeı Ershov Qaraǵandy oblysyna jumys sapary barysynda Osakarov, Buqar jyraý jáne Qarqaraly aýdandarynda bolyp, aýdan ákimderimen, sondaı-aq jergilikti máslıhat hatshylarymen jáne aýdandyq ishki ister bólimderiniń basshylarymen kezdesti.
Kezdesý barysynda depýtat jerlesterine Qazaqstan Respýblıkasy Parlamenti Senatynyń zań shyǵarý jumystary men ótken sessııada Senat qabyldaǵan zańdar týraly jan-jaqty aıtyp berdi. Senator kóptegen zań jobalary azamattarymyzdyń ál-aýqatyn arttyrýǵa baǵyttalǵanyn basa aıtty.
* * *
Senat depýtattary Nurlan Beknazarov pen Aıgúl Qapbarova Shymkent qalasynyń qoǵamdyq keńesiniń múshelerimen kezdesti. Senatorlar olarǵa VII shaqyrylymnyń 2 sessııasy barysynda atqarylǵan jumystar týraly aıtyp, Parlamenttiń osy sessııadaǵy qyzmeti azamattardyń ál-aýqatyn arttyrý jónindegi keshendi sharalar men qoǵamdyq-saıası bastamalardy iske asyrý úshin ýaqytynda zańnamalyq qamtamasyz etýge baǵyttalǵanyn atap ótti.
* * *
Senattyń Konstıtýsııalyq zańnama, sot júıesi jáne quqyq qorǵaý organdary komıtetiniń tóraǵasy Vladımır Volkov Qonaev qalasynda boldy. Ol aımaq aktıvimen, oblystyq jáne qalalyq máslıhat depýtattarymen kezdesti jáne elimizdiń saıası júıesin sapaly transformasııalaýǵa baǵyttalǵan konstıtýsııalyq reformanyń negizgi erejelerin talqylady. Depýtat quqyq qorǵaý organdarynyń ókilderine arnaǵan sózinde jurtshylyq quqyq qorǵaý jáne sot júıelerinen naqty ózgerister kútip otyrǵanyn aıta kelip, polısııanyń ozbyrlyǵyna, biliksiz prokýrorlar men ymyrashyl sýdıalarǵa oryn bolmaýy kerektigin atap ótti.
Senator Vladımır Volkov óz sózinde Parlamenttiń zań shyǵarý qyzmeti týraly tanystyrdy. Onyń ishinde qazaqstandyqtardy áleýmettik qorǵaýdy kúsheıtý jáne elimizdiń áleýmettik-ekonomıkalyq damýyna baǵyttalǵan zańnamalyq aktiler týraly aıtyldy. Ol sondaı-aq Konstıtýsııanyń jańartylǵan normalaryn jáne elimiz Prezıdentiniń basqa da bastamalaryn iske asyrý úshin 20-dan astam zańǵa ózgerister engizý qajet ekenin atap ótti.
* * *
Senat depýtaty Sultan Dúısembınov Jetisý óńirine jumys saparymen bardy. Senator Taldyqorǵan gýmanıtarlyq-tehnıkalyq kolledjiniń oqytýshylarymen orta arnaýly bilim berýdi damytý máselesin talqylady. Bilim oshaǵynyń kúndizgi bóliminde 370-ten astam stýdent bilim alýda. Senator oqý ornynyń materıaldyq-tehnıkalyq jaǵdaıymen tanysyp, kolledj oqytýshylarymen áńgimelesti. Jıyn barysynda bilim oshaǵyna qoldaý kórsetý máselesi jáne stýdentterge arnalǵan sheberhana qurylysyna bıýdjetten qarjy bólý qajettigi talqylandy.
* * *
Senat depýtattary Nurtóre Júsip pen Dınar Nóketaeva Almaty qalasynda «Almatykitap» baspa úıinde eńbek ujymymen kezdesti. Senatorlar Qazaqstandaǵy baspa naryǵyn damytý barysymen tanysa kelip, jańa tájirıbelerge nazar aýdardy. Álem jáne TMD elderi arasynda kitap basyp shyǵarý salasynda úzdikter qatarynan kórinip kele jatqan «Almatykitap» baspa úıiniń qyzmetin 200-den astam mektep paıdalanyp otyrǵany qýantady. Mektep muǵalimderi men oqýshylar «Almatykitap» ázirlegen platforma arqyly úzdiksiz bilim berýdi jalǵastyra alady. Senatorlar Abaı atyndaǵy kitap úıinde bolyp, kitap saýdasyn jetildirý máselesine nazar aýdardy.
