«Reseı ekonomıkasy daǵdarystan kóz ashpaıtyny belgili bolyp otyr. Sebebi aldaǵy jyldarda bul elde ǵylymnyń sońǵy jetistikterine negizdelgen kúrdeli ozyq tehnologııalar shyǵarý qıynǵa túsedi. О́ıtkeni búgingi ozyq tehnologııalar – álem ǵalymdarynyń ortaq jetistikteriniń nátıjesi. Reseıdi aldyńǵy qatarly ǵylym men tehnologııalardyń jetistiginen alshaqtatý ol eldiń áleýetin shektep, ekonomıkasynyń qarapaıymdalýyna alyp keledi. Mysaly, bul el qazirdiń ózinde LADA Granta-ny shyǵarýda otyz jylǵa keıin ketip qaldy. Atalǵan kóliktiń qozǵaltqyshy – 1990-jyldardyń ónimi. Munda ABS júıesi, qaýipsizdik jastyqshasy, ınjektor degen ıgilikter joq. Shanaǵy burynǵy LADA Granta-ǵa uqsas bolǵanymen, ishki dúnıesi túgel eski. Sondyqtan endigi jerde Reseı óndiretin kólikter eýro standarttarǵa sáıkes kelmeýi múmkin. Bul bir ǵana mysal», dedi ekonomıst.
Jaqsybek Qulekeev Reseı ekonomıkasynyń kez kelgen salasynda osyndaı tendensııalardyń oryn ala bergeni bir jaǵynan Qazaqstanǵa tıimdi ekenin aıtty.
«Reseı – 140 mıllıonnan astam halqy bar úlken naryq. Demek halyq tutynýdy toqtatpaıdy. Reseıdiń eń jaqyn shekaralas memleketi biz bolǵan soń olardyń Qazaqstannan jaqsy taýarlardy satyp alýy toqtamaıdy. Qazaqstan endigi jerde óndiristi ishki naryq úshin ǵana emes, kórshiles Reseıdiń naryǵyna da beıimdeı otyryp uıymdastyrýy kerek. Qazirdiń ózinde Reseıden ketken avtomobıl shyǵaratyn iri kompanııalar Qazaqstanǵa kelýdi kózdep otyr. Osyndaı múmkindikti meılinshe durys paıdalanǵan abzal. Bul jerde saqtyq jasap, sanksııaǵa túsip qalmaý jaǵyna qatty mán berý de mańyzdy», dep túıindedi Jaqsybek Qulekeev.
