Atalǵan is-sharany Qusman Shalabaev tóraǵalyq etetin halyqaralyq «Qabanbaı» qory men Almatydaǵy halyqaralyq «Qazaq tili» qoǵamy qolǵa alǵan. Velo-ekspedısııaǵa shyqqan Ertis Nurqasymnyń aıtýynsha, tutastaı bul sapardyń uzaqtyǵy myń shaqyrymdy qurap, onyń barysynda tarıhı oryndardy aralaý kózdelgen.
«Aqshataý, Aıagóz, Úrjar jáne Maqanshy óńiri men Oıran syndy jerlerde elimizdiń táýelsizdigi úshin jaýynger babalarymyz jan berip, Otanymyzdy qorǵap qalǵan. Osy kıeli oryndarǵa toqtap, bahadúrlerdiń rýhyna táý etemiz. Saparymyz Baqty, Jarbulaq jáne Alakólge jetken soń támamdalady. Tutastaı alǵanda, velo-ekspedısııanyń uzaqtyǵy – myń shaqyrym. Bul saparǵa shyǵýdaǵy maqsatymyz – jas urpaqqa batyr babalarymyzdyń erlikterin, elimizdi qorǵaý jolyndaǵy qaıratkerlik isterin dáripteý. Jastar túkti júrekti bahadúrlerimizdiń júrgen joldaryna qanyqsa, eldi, jerdi, til men dildi qorǵaıtyndaı azamat bolyp qalyptasatynyna bek senimdimiz. Sondyqtan da bul amalymyzdyń óskeleń urpaqty otansúıgishtik rýhta tárbıeleýde mańyzy zor.
Ekinshiden, osy arqyly kúni keshke deıin smartfonǵa telmirip otyratyn balalardy velosıpedke otyrǵyzyp, buqaralyq sportty nasıhattaý kózdelgen. Sebebi salaýatty urpaq – el kelesheginiń kepili. Áıtse de bul jerdegi eń basty ustanymymyz – eline adal qyzmet etetin jas azamattardyń jańa legin qalyptastyrýǵa úles qosý.
Yqylym zamandarda osyndaı ulan ǵaıyr jerimizdi babalarymyz jazdyń aptap ystyǵy men qystyń qytymyr aıazyna qaramastan, sondaı-aq terrıtorııalyq aýmaqtyń alshaqtyǵyna qaramastan qorǵap, saqtaı bilgen. Byltyr buǵan uqsas ekspedısııaǵa kólikpen shyǵyp, biraz qundy derekti tapqan edik. Bıyl da kóne tarıhymyzdan syr shertetin málimetter tabylatynyna úmitimiz basym», dedi halyqaralyq «Qazaq tili» qoǵamynyń jaýapty hatshysy E.Nurqasym.
Ashyq derekkózderge súıensek, Qarakereı Qabanbaı 100-den astam jekpe-jekke shyǵyp, jaýdyń ataqty qolbasshylaryn jer jastandyrǵan. Qazaq-jońǵar soǵysynda áskerı qaıratkerligin tanytyp, birikken jaýyngerlik qanatqa basshylyq jasaǵan daryndy batyrlardyń biri. Sol sekildi Daraboz qazaq-qytaı qatynasynda dıplomatııalyq qabiletimen tanylǵan tulǵa. Muny ertedegi Qytaıdaǵy qoljazbalar dáleldeıdi.
Abaı oblysy
