– Qyrkúıek aıynda biz azamattyq qoǵam ókilderin, qor donorlaryn, qazaqstandyq iri kásiporyndar men kásipkerlerdi, Úkimet múshelerin, depýtattardy shaqyryp, úlken onlaın-konferensııa ótkizýdi josparlap otyrmyz. Osy alqaly jıynda biz Qordyń jańa tujyrymdamasyn, qaıyrymdylyq baǵdarlamalar men jobalar nobaıyn bekitkimiz keledi. Sizderdiń usynystaryńyzdy estý biz úshin mańyzdy. Osy maqsatta óńirlerdi aralaımyz, – dep atap ótti B.Jámishev.
Sonymen qatar tóraǵa «Qazaqstan halqyna» qorynyń búgingi tynys-tirshiligi men tyń bastamalary týraly baıandap berdi. Mysaly, uıym qazirgi ýaqytta aýyldyq jerlerdegi bilim berýdi qoldaý jónindegi tıimdi jobalardy izdestirip jatyr eken.
– Arnaıy mektep-ınternattardy jabdyqtaý boıynsha joba daıyndap jatyrmyz. Bul baǵdarlama 99 mektepten ótinim aldy. Sondaı-aq «100 sport zaly» baǵdarlamasyn qarjylandyrý bastaldy, – dedi qor tóraǵasy.
Kezdesý barysynda qoǵam belsendileri densaýlyq saqtaýdy qoldaýǵa, erekshe balalar men múgedektigi bar adamdarǵa kómek kórsetýge qatysy bar usynystaryn jetkizdi.
Qor basshysy bolsa, bul usynystardyń bir de biriniń nazardan tys qalmaıtynyn aıtyp, olardyń aldaǵy ýaqytta keshendi jumys baǵdarlamasy aıasynda múmkindiginshe júzege asyrylytynyna sendirdi.
Kezdesýde Qaraǵandy oblysynyń ákimi Jeńis Qasymbek búginde jergilikti atqarýshy organdardyń áleýmettik kómek kórsetý boıynsha jumys istep jatqanyn baıandady.
– Mysaly, orfandyq aýrýlary bar emdelýshilerge arnalǵan dárilik preparattardy satyp alý bıýdjetten qarjylandyryldy. Júıeli máselelerdi óz deńgeıinde sheshýge tyrysamyz. Mesenattar, demeýshiler de kómektesedi, – dep atap ótti ol.
Degenmen óńir basshysy áli de bolsa kúrdeli máselelerdiń bar ekenin jasyrmady. Sol sebepti de ol óńirdiń atalǵan qormen ózara tıimdi is-qımyl jasaýǵa meılinshe beıildi ekenin jetkizdi.
Kezdesýdiń sońyna taman «Qazaqstan halqyna» qoǵamdyq qory men Qaraǵandy oblysynyń ákimdigi yntymaqtastyq jónindegi memorandýmǵa qol qoıdy.
QARAǴANDY
