«Prezıdenttiń tapsyrmalaryn jedel ári nátıjeli oryndaý qajet. Keshe Memleket basshysy bizdiń jumysymyzǵa qatysty óte mańyzdy syn aıtty. Barlyq memlekettik organdar, ákimdikter men kvazımemlekettik sektordy jandandyrý qajet», dedi Álıhan Smaıylov.
Úkimet basshysy barlyq birinshi basshylarǵa Prezıdent tapsyrmalarynyń árbir tarmaǵyn jeke baqylaýǵa alýdy tapsyrdy.
Onyń aıtýynsha, jergilikti jerlerde azamattardyń ál-aýqatyna tikeleı áser etetin barlyq jobalar men baǵdarlamalar júzege asyrylýda. Sondyqtan mınıstrler men ákimder naqty ózara is-qımyldy jolǵa qoıyp, árbir máseleni birge pysyqtaýy qajet.
