Tık-tok pen Instagram jelisinen kóz aıyrmaıtyn bylaıǵy jurttyń bul áýendi estimeýi múmkin emes. Eger munyńyz jalǵan deseńiz, «Iý-týb» jelisine Sway dep jazyńyz. «E, osy ma?» dep ánge ilesip áýdem jerge deıin terbelip barasyz. Úılesimdi únimen úıirip áketetin shyraıly shyǵarma 50-inshi jyldardyń basynda jaryqqa shyqqan. Odan beri dúnıe neshe ret qubyldy, san márte saýysqan saırady, býlyǵyp bulbul bulaq kezdi, biraq sol mýzykanyń daýysy áli de jańǵyryp tur. O, ǵanıbet! О́mirsheń óleń jazsańyz ajaldyń da qoly qysqa eken-aý... Bizdiń Shámshi, Nurǵısa, Eskendir jazǵan sulý áýender halyqtyń qulaǵynda máńgige boztorǵaıdaı shyryldap jatpaq. Bul ýaqyttyń dármensizdigi emes, dánekerligi. Ǵasyrdan da uzaq ǵumyr…
Shyn máninde, atalǵan ánniń negizgi ataýy Quien sera, ıakı «Kim eken?». Aty-jóni jalpaq jurtqa beıtanys Pablo Beltran Rýıs esimdi meksıkalyq kompozıtor jazǵan. Bul onyń ónerdegi yrymaldy qadamy edi. Áıtse de bastaýyna sáttilik serik bolǵandaı. 1953 jyly ánniń ıspan tilindegi nusqasy tyńdarmandy eleń etkizdi. Artynan aǵylshyn tiline aýdaryp, ákki ónerpaz Dın Martın dúnıeni dúr silkindirdi.
Dın – áldebir sebeptermen Amerıkaǵa qonys aýdarǵan ıtalııalyqtardyń urpaǵy. Saıası turǵydan jergilikti jurt ony ekinshi sanattaǵy aq násildilerge jatqyzady. Ol azdaı, keýdesinen ıterip, kópshilik ortada kemsite sóıleıdi. Sondyqtan ol alyp ımperııaǵa sińisip, óz orynyn tabý úshin nege de bolsa daıyn turdy. Dıno Pol Krochettı (Dınniń shyn aty) 1930-1940 jyldar aralyǵynda ne istemedi dersiz?! Zańsyz alkogoldi sýsyn satty, rıngke shyǵyp tóbelesti de, eń aqyry kazınoda krýper boldy... Bul basbuzar áreket onyń ánshilik talanttyń tanytyp, Rat Pack dep atalatyn kompanııanyń múshesi bolǵanǵa deıin jalǵasty. Bul beıýaq kóńil kóterýshiler men gedonıster qoǵamyn Frenk Sınatra men Sem Devıs basqardy. Ekeýi de ónerge jaqyn jandar edi. Sodan da bolar Dınniń talabyn shyńdap, ónerin óristetedi.
Shoý-bıznes áleminde Dın kóp fýnksııaly adam boldy. Tek ánshi ǵana emes, tabysty ázilkesh ári táp-táýir akter retinde tanyldy. Bul onyń kanonǵa aınalǵan «Terbel» ániniń aǵylshyn tilindegi nusqasyn oryndaýǵa jol ashty. Ol ózine tán qalypta sınızm men mahabbat týraly án aıtqan kezde bıkeshterdi azǵyrýǵa emes, jaı ǵana serigi bolýǵa tyrysatynyn jetkizdi. Syrtqy symbaty men seriligi talaı sulýdy estańdy etkeni elge belgili áńgime-tuǵyn. Onsyz Dın Dın bola ma!?.
Shyǵarmany aǵylshyn tiline tárjimalaǵan aqyn Norman Gımbel mátindi ózgertip, óz nusqasynda jazyp shyqqan eken. Túpnusqaǵa múlde uqsamaıdy. Qalamger tanymal kınokartınalardyń saýndtregine talaı sóz jazǵan, tipti sol úshin ekiniń-birine buıyra bermeıtin Oskar júldesin de ıelengen. Ǵanıbeti sol, kúlli álem ándi Normannyń nusqasynda qabyldady. 1954 jyly Dın Martınniń oryndaýynda AQSh hıt-paradynda 15-shi, Ulybrıtanııada 6-shy orynǵa deıin kóterildi. Munyń ózi úlken jetistik.
Elvıs Preslı Dındi dórekileý djazdyń patshasy dep eseptep, stılin muzǵa teńedi. Newsweek jýrnaly «menmendik onyń shyǵarmashylyq bolmysyna odan ári dám qosty» dep jazady. Onyń júzindegi jumbaq mysqyl, kórkem kekesin, alǵaýsyz ajýa arýlardy alystan-aq arbap aldy. Onyń kıim kıisi de, júris-turysy da qupııaǵa toly, tipti ózimshildigi úshin eshqandaı jaýapkershilik arqalamaıtyny da talǵamyna shek keltirtpeıdi. Jasyryn jaratylysy jankúıerleriniń ishin pystyrmaıtyn edi.
Aıtpaqshy, belgili rejısser Aleksandr Zasepınniń «Almas qol» kınokartınasynda «Qushtarlyq janartaýy» mýzykasynyń jyzylýyna «Terbel» áni tuzdyq bolǵan. Bul áýen tuńǵysh ret Keńes ókimetiniń ekranyna ashyq bılegen arýdyń jaǵymsyz áreketin ákeldi. Al ánshiniń ózi:
«Italııalyqtar óte talantty keledi. Qazirgi ánshilerdiń ómirbaıanyn alsańyz, olardyń 90 paıyzy ıtalııan záýzaty. Munyń bári olardyń kómeıimen emes, júregimen án aıtatyndyǵynan» dep, kerbezdene sóıleıdi. Bul da Dınniń tákapparlyǵynan týǵan pikir emes, sahnadaǵy keıip-keskinine tán tirkes. Shlıapasyn qaıyryp alyp qyjyrta sóılegende onyń aldynan teris aınalyp kete almaısyz. Qaıta qıǵash qalyby ózine quıyp-qoıǵandaı jarasady. О́rkókirek ónerpazdyń zilsiz ázili men ádemi áni áli talaı shyrqalatynyna kúmán joq.
