Áleýmettik mańyzy bar nysan jalpy somasy 207 mln teńge turatyn medısınalyq ońaltý jabdyqtarynyń 90-nan asa túrimen jaraqtalǵan. Arnaıy medısınalyq qyzmetkerler Nur-Sultan, Máskeý jáne Sankt-Peterbýrgte oqytý kýrstarynan ótken.
«Memleket basshysy Qasym-Jomart Toqaev 2022 jyldy Balalar jyly dep jarııalaǵany belgili. Abaı oblysynda perınataldy ortalyqtyń janynan balalar ońaltý ortalyǵy men erte aralasý ortalyǵynyń ashylýy mańyzdy oqıǵa sanalady. Ana men balany qorǵaý qyzmetiniń damýy qoǵamnyń áleýmettik ál-aýqatynyń ındıkatorlarynyń biri ekeni sózsiz. Tutastaı alǵanda, ana men balany qorǵaý – otbasyn nyǵaıtýǵa, ananyń dárejesin kótermeleýge, balalardy tárbıeleýge, sondaı-aq olardyń dene bitimi, zııatkerlik jáne adamgershilik jaǵynan damýy úshin neǵurlym qolaıly jaǵdaılar jasaýǵa baǵyttalǵan memlekettik jáne qoǵamdyq is-sharalar júıesi», dedi Semeı qalasynyń ákimi Baqytjan Baıahmetov.
Atalǵan ortalyqtyń neonataldy jáne pedıatrııalyq qyzmetiniń basshysy Gúljazıra Dúısekenova ortalyqta atqarylǵan jumystyń nátıjelerin aıtty. Máselen, jarty jylda balalardyń 72%-y aıaqqa turyp júre bastasa, 55%-y basyn tik ustap, taǵy 48%-y eńbektep qozǵalýǵa úırengen. Bul – balalardyń qysqa merzimde alǵan daǵdylary.
Munda neıro-ortopedııalyq aýrýlary bar, onyń ishinde serebraldy sal aýrýy bar balalardy ońaltýdyń álemniń úzdik ádistemeleri men zamanaýı tásilderi qoldanylady. Mamandar aýrýdyń erekshelikterin eskerip, ár balany qalpyna keltirýdiń jeke baǵdarlamasyn jasaıdy. Ońaltý úshin qozǵalys daǵdylaryn damytýdyń zamanaýı tehnologııalary, atap aıtqanda arnaıy tehnıkalyq quraldar, trenajerler, apparattar men apparattyq-baǵdarlamalyq keshender paıdalanylady.
Serebraldy sal aýrýy men tirek-qımyl múshelerin emdeý úshin omyrtqanyń, býyndardyń júrý men qozǵalý daǵdylaryn qalpyna keltirýge arnaıy kostıýmder, trenajerler jáne álemdik úzdik óndirýshilerdiń qurylǵylary qarastyrylǵan. Sonymen qatar emdik dene shynyqtyrý, elektroensefalografııa, fızıoterapııa, jaryqpen emdeý, sý massajy, logoped jáne defektologpen kúndelikti jeke sabaqtar ótkiziledi. Immersııalyq vanna, mehanoterapııa, ergoterapevt jáne psıholog kabınetteri, sensorlyq bólme, qurǵaq vanna jumys isteıdi.
Erte aralasý ortalyǵynyń negizgi qyzmetine damýdyń erte kezeńderinde (3 aıdan 3 jasqa deıin) balalarǵa keshendi ońaltý kómegin kórsetý jatady. Nege deseńiz, 3 jasqa deıin balanyń mıy ıkemdi jáne ońaltý emine qolaıly bolyp keledi. Ony neǵurlym erte bastasa, múgedektiktiń aýyrlyǵyn soǵurlym azaıtyp, balanyń aýrýdan saýyǵyp ketýge múmkindigi joǵarylaıdy. Ortalyq mamandarynyń mańyzdy mindetine ata-analarmen jumys júrgizý, olardy qarapaıym kúndelikti is-áreketter men qozǵalystarǵa daǵdylandyrý, onyń ishinde balany durys kóterýge, tamaqtandyrýǵa, sol sekildi kıindirip, otyrǵyzýǵa úıretý kiredi. О́ıtkeni ońaltý isinde usaq-túıek nárse bolmaıdy. Bul ásirese erte kezeńderde asa mańyzdy.
Barlyq kómek (ońaltý, pedagogıkalyq, áleýmettik, psıhologııalyq) tegin kórsetiledi. Eki ortalyqtaǵy jatyn oryn sany – 100, onyń ishinde 30-y táýlik boıy qyzmetke shaqtalǵan.
Jyl saıyn ońaltý sharalaryn 1 200-den asa bala ala alady. Qazir ortalyqta 80 qyzmetker jumys isteıdi.
«Balalarymyzǵa áleýmettenip, ózin ózi kútý daǵdylaryn alýǵa múmkindik bergenderińizge rahmet. Meniń ulym sekildi balalarǵa tipti bir qadamdy jasaýdyń ózi Everestke shyqqanmen teń. Osy ortalyqtaǵy mamandarǵa odan ári órkendep, balalardy emdeý jolyndaǵy qyzmetterine tabandylyq pen tózimdilik, al ata-analarǵa shydamdylyq tileımin», dedi ata-analardyń biri.
Is-shara ońaltýdan ótken balalardyń, olardyń ata-analary men ortalyq qyzmetkerleriniń qatysýymen ótken konserttik baǵdarlamamen aıaqtaldy.
Abaı oblysy
