– О́ńirdegi jol-kólik apatynyń birneshe sebebin aıtýǵa bolady. Birinshiden, qarsy baǵyttaǵy jolaqqa shyǵý, ekinshiden jaıaý júrginshilerdi qaǵý, úshinshiden jol qıylystarynan ótý erejesin buzý, tórtinshiden jyldamdyqty shamadan tys asyrý, besinshiden, mas kúıde rýlge otyrý. Oblys aýmaǵynda jyl basynan beri jyldamdyqty shamadan tys asyrǵan 153 myńnan, qarsy baǵytqa shyqqan 130-dan, jaıaý júrginshilerge jol bermegen 800-den, jaıaý júrginshilerge arnalǵan jolaqtan ótý kezinde 5 myńnan astam quqyq buzýshylyq deregi anyqtalyp otyr, – deıdi E.Bıǵambaev.
Onyń aıtýynsha, jol-kólik oqıǵalaryna Armenııa men Grýzııa Respýblıkasy, Reseı Federasııasy sekildi shetelderde tirkelgen kólik júrgizýshileriniń de qatysy bar. Osyndaı temir tulpardy tizgindegen júrgizýshilerge qatysty jol-kólik oqıǵasynan 75 adam ártúrli dene jaraqatyn alǵany tirkelgen. Qazir Atyraý oblysynyń aýmaǵynda shetelde tirkelgen 30 myńǵa jýyq kólik bar.
– Bıylǵy bes aıda kólik rýline otyrǵan mas júrgizýshilerdiń kesirinen 8 jol-kólik oqıǵasy tirkeldi. Saldarynan eki adam qaza taýyp, 8 adam ártúrli dene jaraqatyn aldy. Patrýldik polısııa qyzmetkerleri 300-den astam mas júrgizýshini anyqtap, ákimshilik jaýapqa tartty. Onyń 270-ge jýyǵy Atyraý qalasynda ustaldy. Al jasóspirimder ushyraǵan 23 jol-kólik oqıǵasynan 2 bala qaza taýyp, 30 bala ártúrli dene jaraqatyn aldy, – dep málim etti E.Bıǵambaev.
Qazir oblys aýmaǵynan ótetin joldarda kólik aǵyny kóbeıgen. Bul júrgizýshilerden saqtyqty qajet etedi. Máselen, respýblıkalyq mańyzy bar Aqtóbe – Atyraý – Reseı Federasııasynyń shekarasy baǵytyndaǵy jolmen 9 myń, Atyraý – Oral jolymen 7 myń, «Dossor – Qulsary – Beıneý jolymen 9 myń, oblystyq Atyraý – Inder jolymen 5 myń avtokólik ótedi. О́ńirdegi tasjoldarda táýliktik kólik aǵyny shamamen 9 myńdy qurap otyr. Atalǵan joldardyń deńgeıi 3-sanatqa jatqyzylýyna baılanysty táýligine 3 myń 500 kólikti ótkizý kózdelgen.
– Biraq bul joldarmen táýligine shamamen 5 500 kólik ótetini tirkelip otyr. Osyǵan baılanysty qala syrtyndaǵy respýblıkalyq, oblystyq mańyzy bar Aqtóbe – Atyraý – Reseı Federasııasynyń shekarasy, Atyraý – Oral, Atyraý – Inder tasjolyna jyldamdyq ólsheýge arnalǵan 3 «Kardon» stasıonarlyq qurylǵy ornatyldy. Bul joldarǵa taǵy osyndaı 14 qurylǵy ornatý jalǵasyp jatyr. Atyraý qalasynyń aýmaǵynda 6 «Kardon» stasıonarlyq jyldamdyq ólshegish qurylǵysy iske qosyldy. Qala syrtyndaǵy joldarǵa avtomatty baǵdarlamamen jabdyqtalǵan úsh aıaqty jyljymaly qurylǵyny paıdalaný úshin merdiger mekememen birlesken jumystar qolǵa alyndy, – deıdi jergilikti polısııa qyzmeti basqarmasynyń bastyǵy.
Munaıly shahar syrtyndaǵy tasjoldarǵa «Sergek» kameralary ornatylady. Mundaı qadamǵa barýǵa adam ólimine soqtyrǵan jol apatynyń kóbeıýi sebep bolyp otyr.
– Qoǵamdyq tártipti saqtaý jáne jol qaýipsizdigin qamtamasyz etý maqsatynda «Kórkemtelekom» kompanııasynyń qyzmetkerlerimen «Sergek» kameralaryn ornatý máselesi talqylandy. Maqsat – Atyraý oblysy aýmaǵynda qylmystar sanyn azaıtý, jol-kólik oqıǵalaryn aldyn alý. «Kórkem – Jaıyq» fılıalymen jasalǵan kelisimshartqa sáıkes Atyraý qalasynyń aýmaǵynda 2020 jyly «Sergek» júıesiniń 2 748 kamerasy ornatyldy. Atalǵan qurylǵylar qoǵamdyq tártipti saqtaý maqsatynda úı aýlalarynda, adamdar kóp shoǵyrlanatyn oryndar men jol qaýipsizdigin qamtamasyz etý úshin avtokólik joldarynyń boıynda, kóshe qıylystarynda jumys istep tur. Bul kameralar túrli qylmysty boldyrmaý men jol qaýipsizdigin saqtaýǵa septigin tıgizdi, – deıdi oblystyq polısııa departamenti bastyǵynyń orynbasary Rýslan Sadırov.
Endi qysqa merzimde Atyraý qalasynda «Sergek» qurylǵylarynyń sanyn arttyrý, sondaı-aq shahar syrtyndaǵy respýblıkalyq, oblystyq mańyzy basym joldarǵa ornatý kózdelgen. Osyǵan baılanysty respýblıkalyq Aqtóbe – Atyraý – Reseı Federasııasynyń shekarasy, Atyraý – Oral, Dossor – Qulsary – Beıneý jáne oblystyq mańyzy bar Atyraý – Inder, Inder – Qarabaý – Mııaly – Saǵyz baǵytyndaǵy tasjoldarǵa kamera ornatý máselesi pysyqtaldy. Jol boıyndaǵy kameralardyń araqashyqtyǵyn da jıiletý josparlanǵan.
Atyraý oblysy
