Baspasóz málimetinshe, ásirese jazda alkogolsiz sýsyn tutyný mólsheri artady. Solardyń kóbiniń japsyrmasynda sýsyn quramynda shyryndar, emdik shópterdiń syǵyndylary, dárýmender men sergitetin zattar bar ekeni jazylady. Bul sýsyndar bulshyqet belsendiligin ýaqytsha yntalandyryp, serotonın arqyly kóńil-kúıdi kóteredi. Shóldi, tipti qarynnyń ashqanyn qysqa ýaqytqa basady. Tanymal alkogolsiz sýsyndardyń paıdasy osy ǵana. Al olardyń, ásirese energetıkalyq sýsyndardyń naqty zııany bar. Mysaly, únemi qoldaný adam aǵzasynyń patologııasyna, tis emaliniń buzylýyna jáne tez salmaq qosýǵa, qant dıabetine, gıpertonııaǵa, aterosklerozǵa jáne basqa aýrýlarǵa ákelýi múmkin.
«Nur-Sultan qalasynyń sanıtarııalyq-epıdemıologııalyq baqylaý departamenti ımporttyq jáne otandyq óndiristen shyqqan alkogolsiz sýsynyń 63 úlgisine, onyń ishinde energetıkalyq sýsynnyń 23 úlgisine saraptama jasady. Zertteý qorytyndysy boıynsha, Eýrazııa ekonomıkalyq odaǵynyń tehnıkalyq reglament talaptaryna 12 ımporttyq sýsyn, onyń ishinde 5 energetıkalyq sýsyn synamasy sáıkes kelmedi», dedi qalalyq sanıtarlyq-epıdemıologııalyq baqylaý departamentiniń bólim basshysy Qarlyǵash Ábdisheva.
Monster Ultra Can jáne Monster Energy Ultra jáne grýzın lımonadynda «Natahtarı» energetıkalyq sýsyndarynda natrıı benzoatynyń konsentrasııasy 1,1-1,2 ese joǵary ekeni anyqtaldy.
Natrıı benzoaty - benzoı qyshqylynyń natrıı tuzy (taǵamdyq qospa E-211).
E-211 konservantynyń konsentrasııasynyń joǵarylaýy ónimniń dámdik qasıetterine áser etip qana qoımaı, adam densaýlyǵyna qaýip tóndiredi. Natrıı benzoaty keıbir adamdarda allergııalyq reaksııalardy týdyrady.
