Eýrazııalyq ınnovasııalyq-tehnologııanyń ózara is-qımyl baǵdarlamasy qajet

ASTANA. 30 sáýir. Memleket basshysy Nursultan Nazarbaev M.V.Lomonosov atyndaǵy Máskeý memlekettik ýnıversıtetinde oqyǵan dárisi kezinde 2025 jylǵa deıingi kezeńdi qamtıtyn Eýrazııalyq ınnovasııalyq-tehnologııalyq ózara is-qımyldar baǵdarlamasyn qabyldaýdyń asa mańyzdy ekenine toqtaldy. Bul týraly egemen.kz tilshisi habarlady. Memleket basshysynyń aıtýynsha, ulttyq ekonomıkalar men eýrazııalyq ıntegrasııa keńistiginiń ınnovasııalyq-tehnologııalyq serpilisi úshin qajetti jaǵdaılar jasaý kerek. Sondyqtan, 2025 jylǵa deıingi kezeńge baǵyttalǵan Eýrazııalyq ınnovasııalyq-tehnologııalyq ózara is-qımyldar baǵdarlamasyn ázirlegen jón. Prezıdent bul baǵdarlamada neǵurlym perspektıvaly baǵyttar boıynsha, máselen, mıneraldy resýrstardy tereńdetip qaıta óńdeý jáne aeroǵarysh, hımııa, mashına jasaý, agroóndiris, energetıka, kólik salalarynda ındýstrııalyq konsorsıýmdar qurý isteri qamtylýy tıis ekenine mán berdi. Buǵan qosa, ol: «Bizdiń ınnovasııalar salasyndaǵy qyzmettestigimizdiń máselelerimen aınalysatyn teńbe-teń negizdegi Eýrazııalyq ınnovasııalyq Keńes taǵaıyndaý mańyzdy dep sanaımyn», – dedi. Dáris barysynda Memleket basshysy tarapynan ekijaqty jáne kópjaqty negizde birlesken ǵylymı-zertteý klasterlerin qurý qajettigi de aıtyldy. Nursultan Nazarbaevtyń pikirinshe, Eýrazııalyq ekonomıkalyq odaq aıasyndaǵy naqty jobalar ekonomıkalyq ıntegrasııanyń qozǵaýshy kúshine aınalyp, básekege qabiletti ónimder shyǵaryp, jumys oryndaryn quryp, ulttyq bıýdjetterge aýdarymdardy kóbeıtýi tıis. Joldybaı Bazar. Derekkóz: egemen.kz. Foto: Nur.kz.