Qazaqstan halqy Assambleıasy – rýhanı kelisim mádenıetiniń negizgi qaǵıdaty

ASTANA. 30 sáýir. Erteń Qazaqstan halqynyń birligi kúni elimiz boıynsha keń kólemde atalyp ótedi. Bul aıtýly merekede tatý-tátti ómirimiz, keń peıilimiz, molynan buıyrylǵan yryzyq-nesibemiz kórinis bermek. Bul týraly egemen.kz tilshisi habarlady. 1 Mamyr meıramynyń joǵary deńgeıde uıymdastyrylýyna, ásirese, Qazaqstan halqynyń Assambleıasy, barlyq etnomádenı birlestikter súbeli úles qosqaly otyr. Qazirgi tańda mádenı-rýhanı ómirimizden laıyqty ornyn tapqan Assambleıa jáne etnomádenı ortalyqtar tarapynan uıymdastyrylatyn sharalar ushan-teńiz. Bulardyń memleket mereıin asyrýǵa talpynǵan osynaý nıetterine alǵystan basqa aıtar sóz bolmas dep oılaımyz. Assambleıanyń HHI sessııasy tabysty aıaqtalǵannan keıin kóp ótpeı óz kezegimen kelip jetken 1 Mamyr merekesinde birlik pen yntymaqty tý etken halqymyz rýhanı kelisimniń, adamgershiliktiń qazaqstandyq modelin osylaısha taǵy bir jańǵyrtpaq. Esterińizge sala keteıik, aǵymdaǵy jyldyń 18 sáýirinde ótken Qazaqstan halqy Assambleıasynyń HHI sessııasynda Memleket basshysy: «Qazaqstan halqy Assambleıasy – ol ári irgetas, ári beıbitshilik, rýhanı kelisim mádenıetiniń negizgi qaǵıdaty. Assambleıa – búkil azamattardyń búkilhalyqtyq ókilderi múddeleriniń ınnovasııalyq modeli jáne bizdiń jas demokratııanyń tabysty quraly. Ol búkil el boıynsha 820 etnomádenı birlestikter qyzmetin shoǵyrlandyrady. Bul degenimiz 70 myń belsendi. Al osy jumysqa barlyǵy 3 mıllıonnan astam adam qatysady», – degen bolatyn. Budan biz Assambleıanyń jáne onyń mańyna toptasqan etnomádenı birlestikterdiń el birligin nyǵaıtýdaǵy rólin ańǵaramyz. Prezıdenttiń aıtýynsha, ótken jyly Assambleıa 10 myń is-shara uıymdastyrypty. Osynaý sharalarǵa 3,5 mıllıonnan astam adam qatysqan. Sondaı-aq, kóptegen óńirlerde Dostyq úıleri qurylǵan. Taǵy bir aıta keter jáıt, búginde Assambleıany 2020 jylǵa deıin damytý Tujyrymdamasy júzege asyrylýda. Joldybaı Bazar. Derekkóz: egemen.kz. Foto: ortalyk-kaz.kz.