Kollajdy jasaǵan Záýresh SMAǴUL, «EQ»
Al osy «Eńbek» baǵdarlamasy aıasynda óz kásibin ashqan abzal jandardyń qatary Eńbekshiqazaq aýdanynda kóbeıip keledi eken. Mysalǵa, Sarybulaq aýylynyń turǵyny, kópbalaly ana Ajarhan Tapaı óziniń jeke kásibin ashý úshin 200 aılyq eseptik kórsetkish kóleminde grant utyp aldy. Kópbalaly ana ótken jyldyń qyrkúıek aıynda halyqty jumyspen qamtý ortalyǵyna baryp, «Eńbek» baǵdarlamasynyń ekinshi baǵyty boıynsha grant alý joldaryn qarastyryp, jańa ıdeıasyn júzege asyrý maqsatynda konkýrsqa qatysqan. Nátıjesinde, jobasyn oıdaǵydaı qorǵap shyǵyp, 583 myń teńge kóleminde grant ıegeri atandy.
– Maǵan grantty qalaı alý, konkýrsqa qalaı túsý kerek ekeni jaıly halyqqa qyzmet kórsetý ortalyǵynyń qyzmetkerleri jaqsylap túsindirip berdi. О́zim – atamekenge oralǵan qandaspyn. Biz Qytaıda turǵan kezde aǵash óńdeýmen aınalystyq. Sol ýaqytta dombyra, astaý jasaıtynbyz. Sondyqtan otbasymyzben kelisip, aǵash sheberhanasyn ashýǵa bel býdyq, – deıdi kópbalaly ana Ajarhan Tapaı.
Jalpy, Ajarhan Qytaıdan elge kóship kelgen soń otbasyn asyraý úshin túrli salada jumys istegen. Al kásip bastaýdy úırengennen keıin baǵdarlama boıynsha utyp alǵan qarajatyna aǵash óńdeıtin stanoktar men qajet qural-jabdyqtardy satyp aldy.
Sondaı-aq Esik qalasynda turatyn kópbalaly ana Rázına Asqanbaı da «Eńbek» baǵdarlamasynyń ıgiligin kórip otyr eken. Rázına da – Qytaıdan oralǵan qandasymyz. Ol kórshi eldi kosmetologııanyń qyr-syryn oqyp, meńgergen bolatyn. Al elge kelgesin óz isin bastaýdy armandap júrdi. Bastapqyda qarjy tapshylyǵy qolbaılaý bolǵanymen, óz izdenisiniń arqasynda memlekettik baǵdarlama arqyly bastapqy qarajat alýǵa bolatynyn bilgen. Qujatty ázirlep, bıznes jobasyn jasaǵan Rázınaǵa «Eńbek» baǵdarlamasy arqyly qoldaý qarjy buıyrǵan. 200 aılyq eseptik kórsetkish mólsherindegi aqsha qolǵa tıgen soń birden kosmotolgııa kabınetin jasaqtapty. Qazir Esik qalasyndaǵy adam aıaǵy úzilmeıtin sulýlyq salonynyń biri – osy Rázııanyń ıeliginde.
Jalpy, aımaqta qyz-kelinshekter kásibiniń damýy jolǵa qoıylǵany anyq. Bul baǵytta oblystyq kásipkerler palatasy janyndaǵy áıelder kásipkerligin damytý ortalyǵynyń bastamasy baıandy deýge tolyq negiz bar. О́ńirde áıelderdi tigin isi men kondıterlik ónim óndirisi boıynsha oqytý jolǵa qoıyldy. Derekterge nazar salsaq, qazir tigin isi boıynsha 25 áıel jáne kondıterlik óndiris boıynsha 26 áıel jańa mamandyq meńgerýge kirisken. Arnaıy kýrstarda kásipkerler, kópbalaly analar, halyqtyń áleýmettik osal toptarynan shyqqan áıelder bilim alýda.
– Oblysymyzda áıelder kásipkerligi belsendi damyp keledi. Byltyr damytý ortalyǵy ashyldy, onda keńester men jobalardy súıemeldeý túrinde qoldaý kórsetiledi. Oqytý áıelder kásipkerligin damytý ortalyǵyna ótinish bildirgenderdiń usynystary eskerile otyryp uıymdastyrylýda. Tegin kýrsty támamdaǵan soń olar maman retinde óz kásibin ashýǵa nemese jumysqa ornalasýǵa múmkindik alady, – deıdi Almaty oblystyq kásipkerler palatasynyń bólim basshysy Sánııa Naýryzbaeva.
Almaty oblysy
