1979 jyly Ál-Farabı atyndaǵy Qazaq ulttyq ýnıversıtetin bitirip, Máskeýden 125 shaqyrym jerdegi «Birikken ıadrolyq fızıka ınstıtýtyna» syrttaı aspırantýraǵa túsedi. Shákirt boıyndaǵy qulshynysty, ǵylymǵa degen qyzyǵýshylyqty baıqaǵan ustazdary ony ǵylymmen aınalysýǵa baýlıdy. Ustazdarynyń eńbegi zaıa ketpeı, 1988 jyly Birikken ıadrolyq zertteýler ınstıtýtynyń professory V.G.Mahankovtyń jetekshiligimen P.Lýmýmba atyndaǵy Halyqtar dostyǵy ýnıversıtetinde «Teorııalyq jáne matematıkalyq fızıka» mamandyǵy boıynsha kandıdattyq dıssertasııa qorǵaıdy. Árıne, qazir aıta salý ońaı bolǵanymen, ol kezde reseılik ǵalymdardyń aldynda ǵylymı tujyrymyńdy dáleldeý tabandylyqty, qaısarlyqty talap etkeni anyq.
Ǵylym men bilim salasyna 40 jyldan astam ýaqytyn sarp etken Rátbaı Myrzaqulovtyń esimi otandyq ǵylym kóshbasshylarynyń biri retinde atalady. Bul jetistikke jetý jolynda 2002 jyly Ál-Farabı atyndaǵy Qazaq ulttyq ýnıversıtetinde «Teorııalyq fızıka» mamandyǵy boıynsha doktorlyq dıssertasııasyn qorǵady. Alys-jaqyn sheteldik JOO-larda oqytýshylyq qyzmet etti. Atap aıtsaq, AQSh-tyń Kalıfornııa ýnıversıteti, Japonııa, Úndistan, Batys Eýropa, Reseıdiń jetekshi ǵylymı ortalyqtary men ýnıversıtetterinde jınaqtaǵan tájirıbesi men jumys istegen jyldary ǵalym ómiriniń jarqyn belesteri desek, qatelespeımiz.
R.Myrzaqulov 2006 jyldan bastap L.N. Gýmılev atyndaǵy Eýrazııa ulttyq ýnıversıtetinde «Jalpy jáne teorııalyq fızıka» kafedrasynyń meńgerýshisi, 6D060400-Fızıka mamandyǵy boıynsha PhD dıssertasııa qorǵaý jónindegi Dıssertasııalyq keńestiń tóraǵasy, «Teorııalyq fızıka Eýrazııa halyqaralyq ortalyǵy» ǵylymı-zertteý ınstıtýtynyń negizin qalaýshy jáne dırektory qyzmetin atqaryp keledi. Ǵalym 2010 jyly jaratylystaný ǵylymdary salasyndaǵy úzdik ǵylymı zertteýleri úshin Q.Sátbaev atyndaǵy syılyqtyń ıegeri atandy, tynymsyz izdenisi men talapshyldyǵynyń nátıjesinde memlekettik ǵylymı stıpendııanyń 6 dúrkin ıegeri boldy. Sondaı-aq Ál-Farabı atyndaǵy Ǵylym men tehnıka salasyndaǵy memlekettik syılyqtyń laýreaty atandy.
Bı-Fatıma ERALHANQYZY,
L.N.Gýmılev atyndaǵy EUÝ stýdenti
NUR-SULTAN
