«Tek ótken demalys kúnderi 80-nen astam jol-kólik oqıǵasy bolyp, 20-dan astam adam qaza tapty. Iаǵnı, jol jaǵdaıyn eskerip, elimizdegi joldarda adamdardyń qaza bolýy, jaraqat alýy, múgedek bolyp qalýy saldarynan Ishki ister mınıstrligi jol qozǵalysy qaýipsizdigi aılyǵyn ótkizýdi uıǵardy. Jol-patrýldik qyzmettiń barlyq ekıpajdary osy sharany ótkizýge barynsha jumyldyrylǵan. Birinshi kezekte jolaýshylardy tasymaldaýmen aınalysatyn kólik quraldary tekseriledi. Iаǵnı, avtobýstar, mıkroavtobýstar, mınıvender, taksı júrgizýshileri. Osy jol apattaryn taldaý nátıjesinde kórgenimizdeı, mysaly, bes oryn qarastyrylǵan jeńil avtokólikte – jeti-segiz adam, bes eresek jáne eki-úsh bala qaza tapqan», dedi Jandos Muratálıev Ishki ister mınıstrliginiń onlaın brıfınginde.
Onyń aıtýynsha, jol-patrýl polısııasynyń túngi ýaqyttaǵy jumysy kúsheıtilgen, sebebi jol-kólik oqıǵalarynyń basym bóligi qarańǵy túskende jıileıdi. Sondaı-aq, demalys kezinde avtokólik joldarynda qozǵalys kóbeıedi. Qyzmetkerler túrli sebepter boıynsha avtokólikterdi toqtatqanda júrgizýshilerdiń ásirese túngi ýaqytta muqııat bolýy úshin túsindirý jumystaryn júrgizedi.
Sonymen qatar, J. Muratálıev birqatar jol apatyn teksergende tejegish iziniń joqtyǵy anyqtalǵanyn, bul júrgizýshilerdiń kólikte uıyqtap ketkenin bildiretinin aıtty. Osy sebepti sońǵy ýaqytta 8 adam qaza taýyp, 9 adam jaraqat alǵan. Sondyqtan, kólikti toqtatqan polısııa qyzmetkerleri júrgizýshiniń jaı-kúıine – sapardy jalǵastyra alatynyna, kóliktiń qaýipsizdik talaptaryna sáıkestigine, jolaýshylar sanyna jáne basqa da máselelerge nazar aýdarady.
