«Prezıdent synynan keıin barlyq múddeli memlekettik organdarmen, qaýymdastyqtar jáne ǵalymdarmen taǵy da jınaldyq. Kıikter popýlıasııasyn retteý jáne paıdalaný máselesi qaıta talqylandy. Biz bul baǵyttaǵy jumystardy, ǵylymı zertteýlerdi tereńirek júrgizý qajet degen qorytyndyǵa keldik. Iаǵnı kıikterdiń kóshi-qon joldaryn, tirshilik etý ortasyn, jem-shóp bazasyn qaraý kerek», dedi Serikqalı Brekeshev Ortalyq kommýnıkasııalar qyzmeti alańynda ótken baspasóz máslıhatynda.
Mınıstr aqbókenderdiń popýlıasııasy únemi ósip otyrmaıtynyn túsindirdi. Onyń aıtýynsha, belgili shek bar, sodan keıin kıikter jem-shóp úshin ózara básekege túsedi.
«Ishki básekelestiktiń artýy janýardyń ózin álsiretedi. Sondyqtan osy máseleniń barlyǵyn taǵy da qarastyramyz. Sodan keıin biz durys sheshimge kelemiz. Biraq, eger tarıhı turǵydan alsaq, Keńes zamanynda kıikterdiń popýlıasııasyn retteý tájirıbesi boldy jáne olardyń sany saqtaldy», deıdi ol.
Sondaı-aq mınıstr kıikter taǵdyryna qatysty sheshim ǵylymı zertteýlerdiń nátıjesinen keıin qabyldanatynyn aıtyp otyr. Aıtýynsha, ǵylymı zertteýler 1-2 jylǵa sozylýy múmkin.
«Zertteýdiń alǵashqy nátıjeleri belgili bolǵanǵa deıin kıikterdiń popýlıasııasyn retteý nemese paıdalaný týraly sheshim qabyldanbaıdy», dedi Serikqalı Brekeshev.
