«9 maýsymda bólim basshysy B.A.-dan Á.Bókeıhanovtyń músinin daıyndaýǵa memlekettik satyp alý týraly shart jasasqany úshin mıllıon teńge kóleminde para alǵan», dedi Pavlodar oblystyq soty.
Sottalýshynyń kinási kýágerlerdiń aıǵaqtarymen, qujattyq dáleldemelermen, saraptama qorytyndylarymen dáleldendi.
Prokýror Samal Begalınovany úsh jylǵa bas bostandyǵynan aıyrýdy surady. Samal Begalınova óz kinásin tolyq moıyndap, bas bostandyǵynan aıyrmaýdy ótindi.
«Qylmystyq kodekstiń 366-babynyń 2-bóliginiń sanksııasynda aıyppul nemese bas bostandyǵynan aıyrý túrindegi negizgi jaza qarastyrylǵan. Aýyr sybaılas jemqorlyq qylmys jasaǵanyn eskere otyryp, sot ony alǵan para somasy – bir mıllıon teńge tárkileýmen úsh jylǵa bas bostandyǵynan aıyrdy. Sottalýshynyń jalǵyz ózi tárbıelep otyrǵan eki kishkentaı balasy (12 jáne 4 jasta) bar ekendigin eskere otyryp, onyń bas bostandyǵynan aıyrý jazasy 5 jylǵa keıinge qaldyryldy», delingen habarlamada.
Sondaı-aq oǵan ómir boıyna memlekettik qyzmette jumys isteýge tyıym salynǵan. Sottalǵannyń tártibin baqylaý turǵylyqty jeri boıynsha probasııa qyzmetine júkteledi.
Úkim zańdy kúshine engen joq.
