Afrıka qurlyǵynda ótken bilekti balýandar básekesinde Qazaqstan ulttyq quramasynyń 11 sportshysy óner kórsetti. Atap aıtqanda, 60 kıloda jastar arasyndaǵy byltyrǵy álem birinshiliginiń qola júldegeri Asyljan Esengeldi, 65 kıloda álem jáne Azııa birinshilikteriniń júldegeri Adlan Asqarov, 70 kılo salmaqta 2021 jylǵy Azııa chempıony Talǵat Syrbaz jáne byltyrǵy el birinshiliginiń jeńimpazy Sanjar Dosjanov, 79 kıloda jýyrda ǵana Almatyda ótken Bolat Turlyhanovty eske túsirýge arnalǵan týrnırde top jarǵan Bolat Saqaev, 86 kıloda Azııa chempıony Azamat Dáýletbekov, 92 kıloda el chempıonatynyń júldegeri Ábdimanap Baıgenjeev, 97 kıloda Azııa chempıonatynyń qola júldegeri Mamed Ibragımov pen el birinshiliginiń kúmis medal ıegeri Serik Baqythanov, asa aýyr salmaqta (125 kg) elimizdiń eń úzdik balýandary Álisher Erǵalı men Iýsýp Batyrmýrzaev el namysyn qorǵady.
Degenmen atalǵan balýandardyń arasynda tek jeti sportshymyzǵa ǵana júldegerler qatarynan kóriný baqyty buıyrdy. Máselen, 86 kılo salmaqta beldesken Azamat Dáýletbekov pen 92 kıloda kúresken Ábdimanap Baıgenjeev týrnır chempıony atandy. Azamat jartylaı fınalda bıylǵy Eýropa chempıonatynyń qola júldegeri túrkııalyq Osman Gıochennen basym tússe, fınalda bozkilem ıesi týnıstik Sabrı Mnasrııadan aılasyn asyryp, altynnan alqa taqty. Al Á.Baıgenjeev alǵashqy aınalymda jastar arasyndaǵy álem chempıonatynyń kúmis júldegeri týnıstik Imed Kaddıdıdi 4:3 esebimen tize búktirse, ekinshi aınalymda Mońǵolııada uıymdastyrylǵan bıylǵy Azııa birinshiliginde úshinshi orynǵa taban tiregen úndistandyq Vıkı Vıkıdiń jaýyrynyn jer ıisketti. Fınaldyq beldesýde taǵy bir Týnıs balýany Chıheb Eddındi aıqyn basymdyqpen jeńip (10:4), Afrıkada Ánuranymyzdy shyrqatty.
О́kinishke qaraı, úsh balýanymyz bas júldege synyq súıem qalǵanda súrindi. 70 kılo salmaqta beldesken Talǵat Syrbaz fınalda 25 jastaǵy amerıkalyq Zeın Reterfordke ese jiberse, Bolat Saqaev (79 kg) ırandyq balýan Mohammad Nohodıdiń osal tusyn taba almady. Al 97 kıloda óner kórsetken Mamed Ibragımov fınalda amerıkalyq dańqty balýan Kaıl Snaıderden jeńildi. Snaıder – 2016 jylǵy Rıo Olımpıadasynyń chempıony, Tokıo Olımpıadasynyń kúmis júldegeri. Sondaı-aq ol eki márte álem chempıonattarynda dara shyqqan saqa balýan.
Sonymen qatar Adlan Asqarov (65 kg) pen Álisher Erǵalı (125 kg) Týnıstegi týrnırdiń qola júldegeri atandy. Bir qyzyǵy, asa aýyr salmaqtaǵy úshinshi oryn úshin ótken beldesýde Álisher Erǵalı men Iýsýp Batyrmýrzaev sheberlik baıqasyp, alǵashqysy alymdy boldy.
О́zge salmaqtardaǵy chempıondarǵa toqtalar bolsaq, 57 jáne 61 kıloda AQSh balýandary Tomas Gılman men Set Gross jeńiske jetse, 65 kıloda úndistandyq Sıýdjet Sıýdjet, 74 kıloda ırandyq Iýnes Emamı jáne asa aýyr salmaqta grýzııalyq Geno Petrıashvılı top jardy.
Kúres túrlerinen bıylǵy álem chempıonaty qyrkúıektiń 10-18 aralyǵynda Serbııada ótedi.
