Mundaı jaǵymsyz statıstıkany óńir basshysy Nurlan Uranhaev sala ókilderimen kezdesýde aıtty. Oblys ákimi ana men balanyń ómirin saqtaý – densaýlyq saqtaý salasyndaǵy mańyzdy ári basty mindetterdiń biri ekenin eske saldy.
«Bıyl oblys kóleminde 28 sábı men bir ananyń ólimi tirkeldi. Osy baǵytta densaýlyq saqtaý basqarmasyna ana men bala ólimin azaıtý úshin Jol kartasyn ázirleýdi tapsyramyn. Sondaı-aq óńirdegi perınataldy ortalyqtardyń jaǵdaıyna muqııat taldaý júrgizý qajet.
Qandaı da ózekti másele bolsa, jasyrmaı aıtý kerek. О́ıtkeni bul adamnyń densaýlyǵy men ómirine qatysty. Sondyqtan saladaǵy kez kelgen máseleni jasyrmaǵan durys», dedi N.Uranhaev.
Oblys ákiminiń aıtýynsha, óńirdegi birqatar aýrýhana men emhananyń ábden tozyǵy jetkendikten kúrdeli jóndeýdi talap etedi.
«Semeıde 200 adamǵa shaqtalǵan juqpaly aýrýlar aýrýhanasyn salý josparlanyp otyr. Sonymen qatar Abaı aýdandyq aýrýhanasyna jáne Kókpektidegi aýdandyq aýrýhanaǵa kúrdeli jóndeý taıaý arada júrgiziledi. Osy óńirdiń týmasy bolǵandyqtan barlyq aýrýhananyń qaı jerde ornalasqanyn, sol sekildi qandaı kúıde turǵanyn jaqsy bilemin. Kez kelgen máseleni birlesip sheshken abzal», dedi óńir ákimi.
N.Uranhaev taıaý jyldary oblysta birneshe medısınalyq nysandar salynatynyn jetkizdi.
«Kadrlyq áleýetimiz jetkilikti, sebebi Semeıde medısınalyq ýnıversıtet pen orta býyndaǵy medısınalyq qyzmetkerlerdi daıarlaıtyn 3 kolledj jumys istep tur. Bul oraıda óńirdegi medısınalyq uıymdar joǵary tehnologııalyq jabdyqtarmen de qamtylǵanyn aıta ketken oryndy. Semeı men aýdandyq eldi mekenderdegi medısınalyq uıymdardy aralap kórdim. Álbette, belgili bir qıyndyqtar bar. Bul, ásirese tozyǵy jetken jabdyqtar men eski ǵımarattarǵa qatysty. Alaıda Jedel medısınalyq járdem aýrýhanasy syndy jaqsy jabdyqtalǵan iri medısınalyq ortalyqtar da qyzmet etip turǵanyn eskerýimiz kerek», dedi ákim.
О́z kezeginde sala ókilderi qordalanǵan problemalardy da jasyrmaı aıtty. Aıtalyq, Semeıdegi eki medısınalyq stasıonar XIX ǵasyrda salynǵan ǵımaratta ornalasqan. Shahardaǵy medısınalyq uıymdardyń basym bóligi 30 jyl buryn paıdalanýǵa berilgendikten mamandar eskirgen nysandarda halyqqa qyzmet kórsetýge májbúr. Sondyqtan da ıgilikti salanyń ókilderi medısınalyq ınfraqurylymdy jańartý máselesin kún tártibine qoıý kerek dep sanaıdy.
Joǵaryda aıtylǵandaı, bıyl oblys ortalyǵynda juqpaly aýrýlar aýrýhanasyn salý kózdelip otyr. Osyǵan baılanysty jobalyq-smetalyq qujattamany ázirleý jumystary qolǵa alynbaq. Bıylǵa mejelengen negizgi mindetterdiń biri – Abaı aýdandyq aýrýhanasy men Kókpektidegi aýdandyq aýrýhanasyndaǵy qazandyqty kúrdeli jóndeýden ótkizý.
Budan bólek, jýyrda Semeıde kóp beıindi balalar aýrýhanasyn, oblystyq qan ortalyǵyn, eki úlgilik emhanany, medısınalyq ýnıversıtet klınıkasyn, sol sekildi óńirdegi eldi mekenderde 19 dárigerlik ambýlatorııa, 44 medısınalyq jáne 8 feldsherlik-akýsherlik pýnkt salý máseleleri qarastyrylady.
Oblys basshysy koronavırýs aýrýynyń taralýyna jol bermeý úshin elimizdegi epıdemııalyq ahýaldy udaıy nazarda ustap otyrýdyń qajettiligin aıtty. Máselen, shildeniń basynda óńirde 31 adamnan koronavırýs ınfeksııasy anyqtaldy. Olardyń 5-eýi ınfeksııalyq stasıonarda emdelip jatsa, qalǵandary ambýlatorlyq em-dom sharalaryn qabyldap jatyr.
«Oblysta 31 adamnan koronavırýs ınfeksııasy anyqtaldy. Úreılenýge negiz joq bolǵanymen arqany da keńge salý áli erte. Halyqtyń qajetti vaksınany alýyna barynsha jaǵdaı jasaý kerek. Aýrýyn jasyrǵan óletinin esten shyǵarmaý kerek. Densaýlyq saqtaý uıymdarynyń basshylaryna birqatar tapsyrmany júkteımin. Jaǵdaıdy tolyq baqylaýda ustaý kerek», dedi N.Uranhaev.
Densaýlyq saqtaý mınıstrligi shildede vırýsqa shaldyqqandardyń sany kóbeıetinin aıtqan edi. Demek qazir ınfeksııalyq aýrýdyń maýsymdyq ósimi baıqalsa kerek.
Abaı oblysy
