Úsh kúnge jalǵasqan dástúrli spartakıadanyń jalpykomandalyq esebinde 128,5 upaı jınaǵan Batys Qazaqstan oblysynyń ókilderi úzdik shyqty. Keıingi orynǵa Aqtóbe oblysynyń (128 upaı) sportshylary jaıǵassa, úzdik úshtikti Pavlodar oblysy (123,5 upaı) túıindedi.
Oblys quramalarynyń jekelegen sport túrlerindegi kórsetkishterine toqtalar bolsaq, voleıbol jarysy boıynsha pavlodarlyq memlekettik qyzmetkerler spartakıada jeńimpazy atandy. Olar asa tartysty ótken fınalda Túrkistannan kelgen áriptesterin 2:1 esebimen tize búktirdi. Al BQO qola medal úshin bolǵan oıynda Jetisý oblysy komandasyn 2:0 esebimen jeńdi.
Qazaq kúresinen ótken beldesýlerde atyraýlyq Bekbol Ábýov (74 kg), elordalyq Oljas Isahanov (90 kg) jáne asa aýyr salmaqta (+90 kg) Jetisý oblysyndaǵy Kerbulaq aýdany ákiminiń orynbasary Ermek Dosalbaev barlyq qarsylastaryn aıqyn basymdyqpen jeńip, jarys jeńimpazdary atandy. Osy tusta Soltústik Qazaqstan oblysynyń Tımırıazev aýdanyndaǵy Selınnoe aýyldyq okrýginiń ákimi, 56 jastaǵy balýan Aıdar Qalıjanovty erekshe atap ótýge bolady. Ardagerler arasynda sambo men qazaq kúresinen el chempıony atanǵan sportshy qola medal úshin kúreskenimen, Erjan Turǵanbaevtan jeńilip qaldy.
Sý sporty túrlerinen 50 metrge brass ádisimen júzýde erler arasynda Baǵjan Ádilbek (Jambyl oblysy), áıelder arasynda qaraǵandylyq Rımma Karımovaǵa teń keler eshkim tabylmady. Erkin stılde 50 metrge júzýde Nargız Sýpaldııarova (Atyraý oblysy) altyn alsa, erler arasynda Ǵalymjan Ahmetov (Aqmola oblysy) top jardy. Shalqalaı júzýde (50 metr) aqmolalyq Roza Qulbaeva men Ardanat Qarataı úzdik shyqty.
Eki kúnge jalǵasqan bılıard básekesinde túrkistandyq memlekettik qyzmetkerler bas júldege ıe boldy. Olar fınalda Shymkent qalasynyń komandasyn qapy qaldyrsa, Aqtóbe úshinshi oryn úshin bolǵan oıynda Petropavldan basym tústi.
Ústel tennısinen erler arasynda Aqmola oblysynyń Astrahan aýdanyndaǵy Esil aýyldyq okrýginiń ákimi Evgenıı Ovchınnıkov jeńimpaz atandy. Al áıelder arasynda osy sportpen uzaq jyldan beri turaqty shuǵyldanyp kele jatqan jambyldyq Aıgúl Nurpeıisova tuǵyrdyń bıik satysynan kórindi.
Shaǵyn fýtbol básekesinde Qostanaı oblysynyń memlekettik qyzmetkerleri fınalda Batys Qazaqstandaǵy áriptesterine esh múmkindik bermeı, 3:0 esebimen jeńiske jetti. Al jergilikti SQO komandasynan basym túsken Nur-Sultan qalasynyń fýtbolshylary qola medal ıegerleri atandy.
Aqyl-oıdyń ushqyrlyǵyn pash etetin toǵyzqumalaq oıynynan tartys sońǵy sátte múlde qyza tústi. Bes týr boıy birdeı nátıje kórsetip kelgen Túrkistan men Pavlodar oblystarynyń ıntellektýaldary sońǵy 6-týrda baryn saldy. Uzaqqa sozylǵan oıynda Pavlodardan kelgen oıynshylar jeńisti julyp áketti. Al jalpykomandalyq esepte Túrkistan 2-shi, Atyraý 3-oryn aldy. Aqtóbe men BQO bestikti túıindedi.
Spartakıadany ótkizýge muryndyq bolǵan Mádenıet jáne sport mınıstrliginiń Sport jáne dene shynyqtyrý isteri komıteti ókilderiniń aıtýynsha, jarysty uıymdastyrýdaǵy basty maqsat – óńirlerdegi memlekettik qyzmetkerler arasynda salamatty ómir saltyn nasıhattaý, olardy sportqa tartý, sporttyń buqaralyq sıpat alýyna jaǵdaı jasaý.
