SQO polısııa departamenti baspasóz qyzmetiniń málimetinshe, SQO men Aqmola oblysynda 16 adam alaıaqqa «jem» boldy. Olar emtıhan tapsyrmaı júrgizýshi kýáligin alýǵa bolady degen jalǵan ýádege senip, ondaǵan myń teńgesinen aıyrylǵan. Zardap shekkenderdiń biri - Taıynsha aýdanynyń turǵyny.
Alaıaqqa aldanǵanyn bilgen ol polısııaǵa júgingen. Jedel-izdestirý is-sharasy nátıjesinde aýdan polıseıleri 34 jastaǵy Kókshetaý qalasynyń turǵynyn anyqtady. Qazirgi ýaqytta ol tergeý ızolıatorynda qamaýda otyr.
QR Qylmystyq kodeksiniń 190-baby 3-bóligi «Alaıaqtyq» boıynsha sotqa deıingi tergep-tekserý júrgizilip jatyr. Búgingi tańda qylmystyq iste 16 epızod tirkelgen.
«Belgilengen rásimderdi aınalyp ótip, júrgizýshi kýáligin satyp alý zańǵa qaıshy keledi. Degenmen, mundaı qadamǵa baratyn adamdar da kezdesip jatady. Muny, óz kezeginde, alaıaqtar paıdalanady. Zardap shekkenderdiń biri kúdiktimen ınternette avtokólik satý týraly habarlandyrý boıynsha baılanysqa shyqqan. Er adam júrgizýshi kýáligin zańsyz ári jyldam alýǵa bolatynyn aıtqan. Aýyl turǵyny kelisimin berip, jańa tanysynyń telefon nómirin alǵan. Osylaısha, adamnan adamǵa tarap, zańsyz qujat alǵysy kelmek bolǵandardyń sany artqan. Keltirilgen shyǵyn somasy 65 myń teńgeden bastalady. Eger adamdar zańdy aınalyp ótip jatsa, alaıaqtardyń burynnan qoldanyp kele jatqan aılalaryna túsýi múmkin. Zańnamany qatań saqtap, kúmándi usynysqa kelisim bermeýdi suraımyz», deıdi Taıynsha aýdandyq polısııa basqarmasynyń bastyǵy Nurlyjan Aqtanov.
