Keshe Reseı Federasııasynyń Astanasy Máskeý qalasyndaǵy “ITAR-TASS” agenttigi ǵımaratynyń úlken májilis zalynda Ulybrıtanııanyń belgili jazýshysy jáne qoǵamdyq qaıratkeri Djonatan Aıtkenniń budan buryn aǵylshyn tilinde jaryq kórgen “Nursultan Nazarbaev jáne Qazaqstannyń jasampazdyǵy” (“Nýrsýltan Nazarbaev ı sozıdanıe Kazahstana”) atty kitabynyń tusaýkeseri bolyp ótti. Oǵan osy elge jumys saparymen kelgen Qazaqstan Respýblıkasynyń Premer-Mınıstri Kárim Másimov qatysty.
Jylqybaı JAǴYPARULY – Máskeýden.
Tusaýkeser rásimin “ITAR-TASS” agenttiginiń basshysy Vıtalıı Ignatenko ashyp, kirispe sóz sóıledi. “Búgin biz Qazaqstan jáne Reseı elderiniń rýhanı-mádenı ómirindegi asa eleýli oqıǵanyń kýási bolyp otyrmyz, – dep bastady ol sózin. – Nursultan Nazarbaev – tek Qazaqstan memleketiniń qalyptasýy ǵana emes, búkil TMD elderiniń damýyna, keńestik kezeńde qalyptasqan baılanystardyń úzilip qalmaı, zamanǵa saı qaıta ıntegrasııalanýyna ólsheýsiz úles qosqan daryndy da tarıhı tulǵa. Sondyqtan belgili aǵylshyn jazýshysy Dj. Aıtkenniń búkil Batys elderi oqyrmandaryn eleń etkizgen kitaby orys tiline aýdarylyp, izinshe Máskeýdiń “Hýdojestvennaıa lıteratýra” baspasynan jaryq kórdi. Osy bir álemdik dárejedegi tanymal tulǵaǵa, búkil qazaqstandyqtarǵa baýyrlas Reseı tarapynan jasalǵan laıyqty qurmet dep bilemin”. Odan keıin sóz kezegi Premer-Mınıstr Kárim Másimovke berildi. Ol óz sózinde dúnıe júzi tanyǵan reformator, Elbasy Nursultan Nazarbaevtyń búginde órkenıet áleminen óziniń laıyqty ornyn alǵan, damyǵan memleketter shoǵyrynda básekege qabilettiligin aıqyndaı bastaǵan jańa Qazaq elin qurýdaǵy balamasyz eńbegin aıta kelip, Qazaqstan Prezıdentiniń ómir joly men kóshbasshylyq ǵumyrdáıegin talǵamy toqsan batys oqyrmandaryna keńinen tanymal etip, erekshe qyzyǵýshylyqtaryn oıata bilgen Djonatan Aıtkenge shynaıy yqylasyn bildirdi. Sonymen birge Kárim Másimov ótkizýge uıytqy bolǵan V.Ignatenkonyń Nursultan Nazarbaevty tek Qazaqstan Respýblıkasynyń Prezıdenti retinde ǵana emes, sonaý bir kezeńderde Qazaqstan jáne Ýkraına magnıtkalarynyń damýyna qoltańbasyn qaldyrǵan metallýrg retinde tanıtynyn, uzaq jyldardan beri syılas azamattar bolyp kele jatqanyn tilge tıek etip, dostyqtyń muqalmas qasıeti taǵy bir qyrynan tanylyp otyrǵanyna shyn alǵysyn aıtty. Aqıqatynda talǵamy tereń Máskeý zııalylarynyń “ITAR-TASS” agenttiginiń úlken májilis zalyna tola jınalýy da osy aıtylǵandardyń aqıqattyǵyn pash etkendeı. Belgili saıasatkerler, ádebıet jáne óner qaıratkerlerimen qatar Reseı astanasyndaǵy joǵary oqý oryndarynyń oqytýshylary men stýdentteri de ótip jatqan mádenı sharaǵa jan-jaqty qyzyǵýshylyq tanytyp, boıaýy keppegen týyndynyń avtory Dj. Aıtkennen qoltańba alý úshin jalyqpaı kezekke turdy. Tusaýkeser rásiminde “Hýdojestvennaıa lıteratýra” baspasynyń basshysy Grıgorıı Prıahın sóz alyp, jaryqqa shyǵyp otyrǵan eńbektiń erekshe qundylyǵyna toqtaldy. Qazir álemde Qytaıdyń ekonomıkalyq damý tájirıbesine tańdanys qandaı dárejede bolsa, TMD elderi keńistiginde qazaqstandyq ekonomıkalyq órleý tájirıbesine qyzyǵýshylyq, ony túsinýge degen talpynys týra sondaı dárejede. Endeshe, qazaqstandyq ekonomıkalyq damý ǵajaıybynyń avtory – reformator Nursultan Nazarbaevtyń ómiri men ónegesine degen qyzyǵýshylyqtyń artyp otyrǵandyǵy zańdy qubylys. Mine, osy ýaqyt suranysyn daryndy jazýshy, Ulybrıtanııanyń kezindegi beldi saıasatkeri, qazirgi tanymal qoǵam qaıratkeri Djonatan Aıtken sheber de sapaly qanaǵattandyra bilgen, dedi ol sóziniń sońynda. Tusaýkeserde shyǵarma avtory Dj.Aıtken jáne RF Syrtqy ister mınıstriniń orynbasary Grıgorıı Karasın de sóz sóıledi. Birneshe saǵatqa sozylǵan otyrysta shynaıy shyǵarma barynsha qyzý talqylandy. “Hýdojestvennaıa lıteratýra” baspasy 10 myń danamen jaryqqa shyǵaryp otyrǵan “Nursultan Nazarbaev jáne Qazaqstannyń jasampazdyǵy” atty kitapty aǵylshyn tilinen Oljas Súleımenov pen Vıtalıı Ignatenko aýdarǵan. Sonymen aǵylshyn tilinde jazylyp, Batys elderi oqyrmandaryn erekshe eleń etkizgen shyǵarma orys tildi qalyń oqyrmanǵa joldama aldy. Sýretterdi túsirgen Shúkir ShAHAI.
