«Zamanaýı mektep» jobasy sheńberinde jóndelip jatqan atalǵan mektep 1967 jyly salynǵan. Munda eki aýysym boıynsha 1 129 bala bilim alýda. Bilim ordasynda 37 kabınet, onyń ishinde 2 zerthana, robottehnıka kabıneti bar.
Jóndeý jumystaryn júrgizýge 3 merdiger uıym tartylǵan. Jumystyń kúrdeliligi sol, bir merdiger ózine tıisti jumysty aıaqtamaı, ekinshi merdiger qandaı da bir sharýaǵa kirise almaıdy. Májilis depýtattary jóndeý jumystary kesteden keshikpeı, balalar bilim kúnin erekshe qýanyshpen qarsy alý kerek ekenin eske saldy. Bul rette, halyq qalaýlylary jergilikti Amanat partııasynyń ókilderi jáne bilim salasyna jaýapty mamandarmen keńese kele, qosymsha kelisimshart jasaý arqyly kestege ózgeris engizýdi usyndy. Sondaı-aq órt qaýipsizdigi máselesine basa nazar aýdarýdy tapsyrdy.
Bilim basqarmasy basshylarynyń aıtýynsha, «Zamanaýı mektep» jobasy aıasynda tek kúrdeli jóndeý ǵana emes, qural-jabdyqtarmen qamtamasyz etý, muǵalimderge de, oqýshylarǵa da yńǵaıly jaǵdaı jasaý kózdelgen. Sonymen qatar Amanat partııasynyń saılaýaldy platformasy negizinde aýyldyq 54 mektepte qaıta jabdyqtaý jumystary júrgizilmek.
2025 jylǵa deıin Pavlodar oblysynyń 82 bilim berý mekemesi «Zamanaýı mektep» jobasy aıasynda jańartylady dep kútilýde.
Pavlodar oblysy,
Aqsý qalasy
