«Qazirgi zamanǵy klımattyq syn-qaterler, sý jáne energetıkalyq resýrstarǵa ósip kele jatqan suranys Aral teńizi basseıniniń sý resýrstaryn utymdy paıdalanýdy qamtamasyz etý úshin batyl sharalar qabyldaýdy talap etedi», dedi Qasym-Jomart Kemeluly baıandama barysynda.
Prezıdenttiń aıtýynsha, klımattyń ózgerý prosesteri muzdyqtardyń azaıýyna ákelip soǵady.
«Klımattyń ózgerýi jónindegi halyqaralyq sarapshylar tobynyń baıandamasyna sáıkes, bizdiń aımaqtaǵy temperatýra planetadaǵy ortasha temperatýradan áldeqaıda tez ósýde. Klımattyń ózgerý prosesteri bizdiń aımaq úshin negizgi sý kózi – muzdyqtardyń azaıýyna ákeledi. Olardyń Ortalyq Azııadaǵy kólemi sońǵy 50 jylda 20-30%-ǵa qysqardy, bul perspektıvada Syrdarııa men Ámýdarııa ózenderiniń aǵynyn birneshe ese azaıtady. Munyń bári shuǵyl birlesken sharalar qabyldaýdy talap ete otyryp, óńirdiń azyq-túlik, energetıkalyq jáne ekologııalyq qaýipsizdigi úshin eleýli táýekelderge ákep soǵady», dedi Memleket basshysy.
