«Qazirgi ýaqytta respýblıka boıynsha vaksınalaý jáne revaksınalaý jumysy jalǵasyp jatyr. Qazaqstanda vaksınanyń úsh túri qoljetimdi, olar – QazVac, Sinopharm jáne Pfizer. Revaksınalaý úshin – QazVac jáne Sinopharm bar», dedi Roza Qojapova ortalyq kommýnıkasııalar qyzmetinde ótken baspasóz máslıhatynda.
Onyń aıtýynsha, ekpe egý pýnktilerinde 1 mln 600 myń vaksına dozasy bar.
«Búgingi tańda koronavırýs ınfeksııasyna qarsy vaksınamen eresek turǵyndardyń 80%-dan astamy nemese barlyq halyqtyń 56%-dan astamy qamtylǵan. Respýblıka boıynsha koronavırýs ınfeksııasyna qarsy bastapqy revaksınalaýmen qamtý tıisti halyqtyń 68%-dan astamyn (4,9 mln adam) qurady. Orta eseppen táýligine 10 myńnan astam adam ekpe saldyrady», dedi Roza Qojapova.
Basqarma basshysy mamyr aıynyń sońynan bastap elde revaksınalaý engizilgenin eske saldy. Búginde tıisti halyqtyń 55%-y revaksına jasatqan.
