Vıse-premer «Meıirim» kópsalaly medısına ortalyǵynda bolyp, onyń qyzmetimen, múmkindikteri jáne ondaǵy jańashyldyqtarmen tanysty.
Sonyń biri - elimizdiń barlyq óńirlerin beınekonferensııa baılanysy arqyly qosatyn telemedısına kabıneti.
Atalǵan jobanyń arqasynda shalǵaı eldi mekenderdiń turǵyndary sapaly medısınalyq kómek, keńes ala alady, al dárigerler tájirıbe almasyp, konsılıým ótkizedi.
Eraly Toǵjanov elimizdiń árbir azamatyna medısınalyq qyzmetterdiń qoljetimdiligin qamtamasyz etýdiń mańyzyn atap ótti.
Vıse-premer kásipkerlik nysan «Táýelsiz ómir DOS» ortalyǵynda da boldy.
Munda múmkindigi shekteýli jandardyń belsendi derbes ómirge oralýyna jáne azamattyq qoǵamǵa kirigýine kómek kórsetiledi.
Ortalyqta 28 adam qyzmet etedi, onyń ishinde múmkindigi shekteýli 17 adam bar.
Atalǵan nysannyń ókilderi «ońaltý tehnıkasyn satý boıynsha shoý-rýmdy», tehnıkany, múkámmaldy jáne basqa jóndeý júrgiziletin «Inva-STO» servıs ortalyǵyn tanystyrdy.
Premer-Mınıstrdiń orynbasary óz sózinde múmkindigi shekteýli adamdardyń kóp kezdesetin qıyndyqtary týraly aıtyp, qyzmetkerlerge basa nazar aýdarýdy qajet etetin baǵyttardy atap ótti.
Sondaı-aq, ortalyqtaǵy problemalyq máselelerdi surap, elorda ákimdigine memlekettik organdarmen birlesip, olardy qysqa merzimde sheshýdi tapsyrdy.
«Memleket basshysynyń tapsyrmasy boıynsha Úkimet halyqtyń tabysyn arttyrý baǵdarlamasyn júzege asyryp jatyr. Mundaǵy negizgi maqsat - ekonomıkany ındýstrııalandyrý jáne ártaraptandyrýmen, kásipkerlikti damytýmen ushtasqan halyqtyń tabysyn arttyrý jáne nátıjeli jumyspen qamtamasyz etý. Baǵdarlamada kózdelgen sharalar halyqtyń áleýmettik osal toptary men tabysy tómen azamattardyń paıdasyna bıýdjet qarajatyn ádil bólýge, olardyń ekonomıkaǵa odan ári ıntegrasııalanýyn yntalandyrýǵa baǵyttalǵan. Bul - jańa múmkindikter baǵdarlamasy, ásirese kómekke muqtaj adamdar úshin. Onyń mindeti - tek qarajat bólý ǵana emes, alýshylardy jumyspen qamtýdyń ártúrli nysandaryna tartý arqyly ózderiniń áleýmettik mártebesin ózgertýge, materıaldyq jaǵdaıyn jaqsartýǵa yntalandyrý. Baǵdarlamanyń osyndaı baǵyttarynyń biri - áleýmettik kásipkerlik», dedi Eraly Toǵjanov.
Vıse-premer barǵan kelesi nysan áleýmettik osal sanattarǵa jatatyn adamdardy oqytýǵa jáne jumysqa ornalastyrýǵa baǵyttalǵan joba bolyp tabylatyn «Green TAL» áleýmettik kásiporny boldy.
Jobaǵa 62 adam tartyldy, onyń 53-i áleýmettik osal sanattarǵa jatady. Vıse-premer kásiporynnyń qyzmetimen, onyń óndirisimen jáne qýatymen tanysty.
EralyıToǵjanov Úkimet tarapynan basa kóńil bólinetinin, jan-jaqty qoldaý kórsetiletinin jáne áleýmettik kásipkerlerge óz isiniń básekege qabilettiligi men rentabeldiligin qamtamasyz etý qajettigin atap ótti.
Vıse-premerdiń aıtýynsha, mundaı jobalar tabysy joǵary tolyqqandy bızneske aınalýy tıis.
Sondaı-aq, vıse-premer tıisti memlekettik organdarǵa áleýmettik kásipkerlikti damytýǵa baılanysty problemalyq máselelerdi jeke otyrysta qaraýdy tapsyrdy.
