О́zekti máselelerdi kóterdi

Kezdesýde alǵash sóz alǵan oblystyq ardagerler keńesiniń tóraǵasy Erkinbek Soltybaev óńirdegi aǵa býyn ókilderiniń, zeınetkerlerdiń ty­nys-tirshiligi jaıly oı qozǵady. Onyń aıtýyn­sha, oblysta 128 myń zeınetker bar. Bul óńir halqynyń 11,5 paıyzyn quraıdy. Olardyń ishinde Uly Otan soǵysy ardagerleriniń sany nebári 23, al tyl ardagerleriniń eń jasy qazir 85 jasqa jetken.

Basqosýda sóz alǵan Memleket basshysynyń keńesshisi bıylǵy jyldyń saıası reformalarǵa toly bolǵanyn atap ótip, el ómirindegi mańyzdy oqıǵa – referendýmǵa jambyldyqtardyń seksen paıyzdan astamy qatysyp, olardyń basym kópshiligi qoldaý bildirgenin tilge tıek etti. Son­daı-aq ol jambyldyq aqyn-jazýshylardyń, qalamgerlerdiń shyǵarmalarymen etene tanys ekenin jetkizdi.

Kezdesý barysynda oblystyq arhıvtiń dırektory, qalamger Kósemáli Sáttibaıuly sóz sóıledi. Ol óz sózinde qazirgi tańda arhıv ǵımaratynyń eskir­genin, ol úshin Taraz qalasyndaǵy 15-shi shaǵyn aýdan aýmaǵynan 1,5 gektar jer suraǵanyn, qazirgi tańda qıyndyqtar týyndap otyrǵanyn tilge tıek etti. Sonymen qatar ol saıası qýǵyn-súrgin qurban­daryn tolyǵymen aqtaý máselesin kóterdi. Jazýshy-dra­matýrg Elen Álimjan, ardager Ázimbek Tileshov kólik quraldaryn  tehnıkalyq baqylaý­dan ótkizetin oryndardyń jekeshelenip ketkenin aıtyp, dabyl qaqty.

Kezdesý barysynda sóz sóılegen ardager Kúlásh Nazar­bekova jergilikti emhanalarda arda­ger­lerge medı­sınalyq qyzmet tıisti deńgeıde kórsetil­meıtinin aıtty. Oblys aýmaǵyndaǵy shıpa­­jaılardyń barlyǵy jekemenshik bolǵan­dyq­tan ardagerlerdiń emdelýge qaltasy kóter­meıti­nin, sondyqtan zeınetkerlerge arnalǵan arnaıy pan­sıonat qajet ekenin sóz etti. Qazaqstannyń qurmet­ti jýrnalısi Beket Momynqul áleýmettik jelilerde el ishine iritki salyp, Abaı men Baýyrjan Momyshuly sekildi ult tulǵalaryna negizsiz til tıgizip, jastardyń sanasyn ýlap júrgen blogerler­ge zańmen shekteý qoıýdy talap etti.

Kezdesýde ózge de birqatar azamat ózekti máse­le­lerdi qozǵady. Jıyn sońynda sóz alǵan Málik Otarbaev árbir máseleni jiti nazarǵa alyp, sheshilý joldaryn qarastyryp, el Prezıdentine jetkizýge ýáde etti.

Jambyl oblysy