Shildeniń 24 Tótenshe jaǵdaılar departamentine Ertis ózeninde 1983 jylǵy er adamnyń sýdan qutqarylǵany týraly aqparat túsken.
Belgili bolǵandaı, qala turǵyny Sergeı Fomınyh sýda eshbir qımylsyz qalqyp bara jatqan er adamdy baıqap, sol sátte kómekke umtylady. Oǵan er azamatty ózennen alyp shyǵýǵa Erjan Jáńgirov kómektesken. Olar zardap shekken adamǵa birden alǵashqy medısınalyq kómek kórsete bastaǵan. Qutqarýshylardyń qataryna Vıktor Glınskıı esimdi qala turǵyny da qosylyp, reanımasııalyq áreketter jasaýǵa járdemsken.
«Reanımasııalyq árekettiń 4-shi mártesinde er azamat esin jıyp, ony jedel járdem dárigerlerine tapsyrdy. Belgili bolǵandaı, zardap shegýshi dosymen birge ózenniń belgilenbegen jerinde shomylyp júrgende esinen tanyp qalǵan», delingen taratylǵan aqparatta.
Bul rette tótenshe jaǵdaılar qyzmeti sý mańyndaǵy tártip erejelerin qatań saqtaýdy eskertedi. Ásirese belgilenbegen oryndarda shomylýdan bas tartyp, sýǵa mas kúıinde túspeýge, jalǵyz júrmeýge, sol sekildi júzý daǵdylaryn meńgermegen jandarǵa ózen-kólderge túsýden saq bolýǵa keńes beredi.
