Balabaqshalarda balalarǵa qaraý jaǵdaıyna, qyzmetkerlerdiń jumysyna, sondaı-aq búldirshinderdiń densaýlyǵyna ári ómirine zııan keltirýge qatysty shaǵymdar bar.
«Sońǵy túsken aryz-shaǵymdar boıynsha tekserý júrgizilip, balalardyń ómiri men densaýlyǵyna zııan keltirý faktileri boıynsha 5 ákimshilik is qozǵaldy. Ishki ister mınıstrligi mektepke deıingi uıymdarǵa qatysty 15 ákimshilik is qozǵady. Rezonans týdyrǵan oqıǵalardyń biri retinde Nur-Sultan qalasyndaǵy «Satı» jekemenshik balabaqshasynda búldirshinderge qatysty zańsyz faktiler tirkelgen. Onda balabaqsha qyzmetkerleri balalardy súırep, buryshqa turǵyzyp, daýys kótergen», delingen mınıstrlik málimetinde.
Al Atyraý qalasyndaǵy jekemenshik mektepke deıingi mekemede toptaǵy balalardyń kóp bolýyna baılanysty tárbıeshi balalarǵa durys baqylaý júrgizbegen. Sonyń saldarynan balabaqshadaǵy úsh búldirshin 2019 jyly týǵan qyzdy uryp-soǵyp, denesine zaqym keltirgen.
«Qyzylordada jekemenshik balabaqshalardyń biriniń júrgizýshisi mekemege 7 balany alyp kelgen. Balalardy balabaqshaǵa kirgizgen tárbıeshiniń kómekshisi bir balanyń kóshede qalyp qoıǵanyn baıqamaı qalǵan. Júrgizýshi de balaǵa mán bermeı, balany qaǵyp ketken. Osynyń saldarynan bala aýrýhanaǵa bara jatqan jolda kóz jumdy. Osy fakti boıynsha qylmystyq is qozǵaldy», dep atalyp ótken vedomstvo habarlamasynda.
Aıta keteıik, qazirgi kezde balabaqsha ashý jáne jumys isteý úshin ýákiletti organǵa habarlama jiberý jetkilikti. Degenmen bilim basqarmalarynyń mektepke deıingi uıymdardy aralap, tekserýge zańdy quqyǵy joq.
«Osyǵan baılanysty balabaqshalardy lısenzııalaý bastamasy qolǵa alynyp jatyr. Bul balabaqshalardaǵy jaǵdaıǵa, qyzmetkerlerdiń biliktiligine, sanıtarlyq jáne órt qaýipsizdigi erejeleriniń saqtalýyna, tamaq ónimderiniń sapasyna, beınebaqylaý kameralarynyń jumysyna jáne basqa da talaptardy belgileıdi», delingen mınıstrlik túsiniktemesinde.
