Jan Bero. Parıjdiń zaıyrly qoǵamynyń bet-beınesin, estetıkasyn, minezin, qalyp-keskinin, tipti kıim kıisine deıin bizge syılaǵan sýretker. Ol fransýz sulýlyq salonynyń sýretshisi. «Vıktorııa» kartınasyna qarańyzshy... Kóshirme me, joq kórkem keskindeme me? Qalaı oılaısyz? Iá, munda jarqyn kompozısııa, kórkemdik sheberlik, qorshaǵan dúnıeniń ıdealıstik kórinisi bar. Talǵampaz bıkeshtiń tazalyǵy hám tákapparlyǵy anyq baıqalady.
Olaı bolsa Parıjge ǵashyq bolmaý qylmys qoı. Bero ásem shahardyń jańa kelbetin syzdy. Qala turǵyndarynyń qaǵıdasyn, joǵary qoǵamnyń talǵampaz hanymdaryn men márt myrzalaryn, tipti qarapaıym adamdardyń ómir kúndeligin baıandady. Mundaǵy sıqyrly sıýjetter alýan túrli jáne sheber detaldarmen ádiptelgen. Túrli-tústi realızm dersiz.
Alaıda sarapshylar osyǵan baılanysty sheberdi aıaýsyz synǵa aldy. Nege onyń basty keıipkerleri mańǵaz, dókeı keledi? Bul qarabaıyrlyq ne jasandylyq emes pe? Joq, keshirip qoıyńyz, olaı emes. Onyń beıneleý tehnıkasy fotografııalyq jazý stıline jaqyn. Sonysymen de áserli ózgege uqsamaıdy. О́nertanýshylar mundaı stıl kommersııalyq turǵydan yńǵaıly, kópshiliktiń talǵamyna sáıkes keledi deýi múmkin. Aıta bersin...
Degenmen, «Vıktorııa» sııaqty kartınalar óz jankúıerin tapty. О́kinishke qaraı, bul shyǵarma jaıly naqty aqparat saqtalmaǵan. Sondyqtan bul ataý týyndydaǵy áıeldiń atymen berildi me, álde basqa maǵynada qoldandy ma belgisiz. Páýeskede kele jatqan, abaısyzda nemese ádeıi «kadrǵa túsip qalǵan» bıkesh beınesi jańa ýaqyt pen jańa ıdeıalardyń jemisi. Ashyq túster, keń shtrıhtar, sheberdiń jyldam tehnıkasy qyzyqtyrady.
Sýrettiń oń jaǵy tolyq jazylmaǵan. Áıtse de bul bitpegen jumys emes, quddy eskız sııaqty. Bero osy tehnıka arqyly fransýzdar maqtaǵan «ǵajaıyp dáýirdiń» alystap bara jatqanyn meńzep turǵandaı. Sondyqtan onyń shyǵarmalary bir mezgilde jańarǵan Parıjge jańa kózqaras retinde qabyldanyp, ótkendi eske túsirýge, ótkenniń muńdy jańǵyryǵymen júrekti jylytýǵa umtylady.
