Kezdesýge Jambyl oblysynyń ákimi Nurjan Nurjigitov, oblystyq máslıhat pen jergilikti atqarýshy organ ókilderi, aýdan ákimderi qatysty.
T.Dúısenova qazirgi eńbek naryǵynda bolyp jatqan ózgerister týraly aıtty. Ulttyq statıstıka bıýrosynyń aqparatyna sáıkes, Jambyl oblysynda jaldamaly jumysshylardyń sany 1,2 myńǵa kóbeıgen. Al ózin ózi jumyspen qamtyǵandar sany 2,3 myń adamǵa azaıǵan. Jumyssyzdyq deńgeıi – 5,1%, jastar arasyndaǵy jumyssyzdyq deńgeıi – 3,1%.
Jambyl oblysynda 15-28 jas aralyǵyndaǵy jastardyń sany – 221 myń. Bul – oblys halqynyń 19%-y. Osyǵan oraı mınıstr jastardy jumyspen qamtýdyń mańyzyna toqtaldy.
«Jambyl oblysyndaǵy jastardyń sany 2030 jylǵa qaraı 64 myń adamǵa kóbeıip, 286 myńǵa jetedi. Al 2040 jylǵa qaraı bul kórsetkish taǵy 100 myńǵa artady. Ekonomıkalyq belsendi jastardyń sany 2030 jylǵa qaraı 149 myńǵa deıin kóbeıip, eńbek naryǵyna kúsh túsiretini anyq. Mekteptegi bilimmen qalǵan jastardyń úlesi – 18%, al joǵary bilimi bar jastardyń úlesi – 39%. О́ńirde jumyspen qamtylǵan 157 myń jastyń 101 myńy – jaldamaly jumysshylar», dedi T.Dúısenova.
Mınıstr bıylǵy 6 aıda oblysta 27 myńnan asa adamnyń jumysqa ornalasqanyn atap ótti. Onyń basym kópshiligi – 17 myńnan asa azamat jumyspen qamtý ortalyqtary arqyly jumysqa turǵan.
«Ulttyq jobalar aıasynda ashylyp jatqan turaqty jumys oryndarynyń kórsetkishi tómen. Jambyl, Jýaly, Turar Rysqulov, Moıynqum aýdandarynda bul jumys múlde júrgizilmegen. Sarysý aýdanynda 9 adam ǵana Ulttyq jobalar aıasynda jumyspen qamtylǵan.
Monıtorıng júrgizý tártibine saı, jumysqa turǵan azamattar mindetti zeınetaqy jarnalarymen, jeke tabys salyǵynyń bar-joǵymen rastalady. Jambyl oblysynda bul kórsetkish 48% bolyp otyr. Oblys deńgeıinde eń tómengi kórsetkish Jambyl jáne Sarysý aýdandarynda tirkelgen», dedi mınıstr.
T.Dúısenova Jambyl oblysynyń óńirlik kartasynda kózdelgen 4 576 turaqty jumys ornynyń bıylǵy jarty jylda 433-niń ǵana ashylǵanyn atap ótti. Al osy óńirlik kartada kózdelgen 235 Ulttyq jobanyń 123-i ǵana Elektrondy eńbek bırjasyna engizilgen.
«Elektrondy eńbek bırjasyna engizilgen Ulttyq jobalar aıasynda jarııalanǵan jumys oryndarynyń taldaý nátıjeleri: Jambyl oblysy boıynsha jarııalanǵan 1 999 orynnyń 520-syna belgili bir biliktilik talaptary qoıylǵan, al 1 479-yna talap joq. Osy jumys oryndaryna jiberýge bolatyn jumyssyzdardyń da sapasyn qaradyq. Jambyl oblysynda jumyssyz retinde tirkelgen 4 816 jumyssyz adamnyń 2 526-nyń biliktiligi bar, al 2 290 adamnyń biliktiligi joq.
Jambyl oblysynda bos jumys oryndary jetkilikti ekenin Elektrondy eńbek bırjasyndaǵy osy mysaldardan kórýge bolady. Jumyssyz qalyp jatqan azamattarǵa qoldaý kórsetip, qajetti jumys oryndaryna ornalasýǵa barynsha qoldaý kórsetý barlyǵymyzdyń mindetimiz ekenin umytpaǵanymyz jón», dedi mınıstr.
О́ńir aktıvimen kezdesýde qazaqstandyqtardy zeınetaqymen qamtý, áleýmettik qoldaý sharalary, múgedektigi bar adamdardy qoldaý sharalary da talqylandy.
