Torǵaı – Alash arystary shyqqan, patsha ókimetiniń qıturqy saıasatyna qarsy kóptegen kóterilis uıymdastyrylǵan erekshe aýdan. Ult ustazy Ahmet Baıtursynuly men birtýar azamat Mirjaqyp Dýlatovtyń da otany. Tanymal halyq batyrlary, aqyn-jazýshylar, oqymystylar, halyq ártisteri, ánshi-kúıshiler, sportshylar, aýyl sharýashylyǵy salasy boıynsha Sosıalıstik Eńbek Erleri de kóptep sanalady. Aýdan ortalyǵyndaǵy bes mýzeı, Ardagerler úıi, Amanat partııasynyń keńsesi úzbeı jumys isteıdi.
Sol ataqty da talantty jerlesterimizdi kórip eseıgen, kezinde túrli qyzmet atqarǵan kózi ashyq, kókiregi oıaý keshegi jastar – búgingi ardagerler jınalyp, Prezıdenttiń Joldaýlaryn, basqa da bastamalaryn, Úkimet otyrystarynda kóterilgen ózekti máselelerdi talqylap, pikir almasamyz, mádenı is-sharalar men sport jarystaryn tamashalaımyz.
Sport demekshi, qazir olardyń túri kóbeıdi. Jastarymyz da solarmen jan-jaqty aınalysa bastady. Qazaq jastary, ásirese áýesqoı boksty tolyq meńgerip, Olımpıada, álem, Azııa chempıonattarynda top jaryp júr. Birazy kásipqoı boksqa aýysyp úlgerse, ol jaqta da tabyssyz emes sııaqty. Ulandarymyzdyń qaıratty, qarýly ekenderin maqtanyshpen aıtamyz. Jylt etken jaǵymdy jańalyq estisek, bir-birimizge qýana habarlap jatamyz.
Sózimniń sońynda aıtpaǵym mynaý edi. Qurmetti «Egemen Qazaqstan» gazetiniń sport taqyrybynda jazatyn jýrnalısteri! Biz, torǵaılyq ardagerler, qazirgi kezde Qazaqstannyń neshe boksshysy kásipqoı boksta júr jáne olardyń árqaısysy neshe márte sharshy alańǵa shyqty, jeńgeni, jeńilgeni, teń túskeni nesheý, qaısysy qashan bokstasady, qarsylastary kimder degen sııaqty qyzyqty málimetterdi udaıy bilip otyrsaq deımiz. О́tinishterimiz aıaqsyz qalmaıdy dep senemiz.
Jaqan qajy IBRAEV,
Jaqsylyq AHMETOV,
Toıǵanbol NURHANOV,
Jumahan SÁDÝAQASOV
Qostanaı oblysy
