Korporatıvtik qordyń basshysy Alfııa Adıevanyń aıtýynsha, qor óskeleń urpaqqa jaǵdaı jasaý baǵytyna aıryqsha nazar aýdaryp keledi. Maqsat – eldegi balalarǵa densaýlyq jaǵdaıyna nemese áleýmettik deńgeıine qaramastan, sapaly bilim alý úshin alańsyz, baqytty, salamatty ómir ortasyn qalyptastyrý.
Belgili bolǵandaı, qordyń 2022 jylǵa arnalǵan Qaıyrymdylyq baǵdarlamasy 10 mlrd teńgeni quraıdy. Áleýmettik jobalardy qarjylandyrýǵa ótinimder Samruk-Kazyna Trust saıtynda ornalastyrylǵan Qaıyrymdylyq kómek kórsetý erejesine sáıkes, úkimettik emes uıymdardan qabyldanady. Maquldanǵan jobalar arasynda aýtıstik spektrdiń aýrýlary men mentaldi buzylystary bar balalarǵa arnalǵan
8 ortalyq qurý, damýy buzylǵan jáne olardyń týyndaý qaýpi bar balalarǵa erte dıagnostıkalyq jáne abılıtasııalyq kómek kórsetý boıynsha 13 erte aralasý ortalyǵyn qurý, Jańaózen qalasynyń mektepterin jıhazben jáne ınteraktıvti paneldermen jabdyqtaý, otbasylyq aýla klýbtaryn demeý arqyly halyqtyń áleýmettik osal toptarynan shyqqan balalar úshin túrli seksııalar uıymdastyrý, sondaı-aq Atyraýda erekshe balalarǵa tegin kómek kórsetý bastamasy bar.
– Samruk-Kazyna Trust qory búginde Qazaqstannyń shalǵaı eldi mekenderine sapaly medısınalyq kómek kórsetý maqsatynda «Járdem» jáne «Salamatty Qazaqstan» poıyzdaryn tabysty iske qosty. Qaraǵandyda «Basqarylatyn gıpotermııa» ınnovasııalyq jobasy nárestelerdiń shetineýi men múgedektigin azaıtýda. Shymkent qalasynda neıro-ortopedııalyq buzýshylyqtary bar balalardy ońaltý qolǵa alynsa, «Balalarǵa ómir syıla», «Aýtızmdi jeńemiz!», «Jetim balalarsyz Qazaqstan» jobalary da jalǵasyn tappaq. Aǵa býyn ókilderine qamqorlyq tanytýda «Taǵylym» jáne «Jeńis» jobalary júrgiziledi. Budan basqa, Samruk-Kazyna Trust memlekettik tildiń kókjıegin keńeıtýde Soyle jobasyn qoldaýdy jón dep tapty, – deıdi A.Adıeva.
Onyń aıtýynsha, ózgerister turǵysynda qor qyzmet baǵyttaryn ońtaılandyryp, jobalardy qarjylandyrý jaıyn bekitetin Qamqorshylyq keńes quramyn keńeıtýde. Sonymen birge qor saıty jańaryp, «Samuryq-Qazyna» AQ Qoǵamdyq keńesine esep berý jolǵa qoıyldy.
2023 jyldan bastap qaıyrymdylyq jobalaryn iske asyrý kezinde olardyń 30 paıyzynda eldik jobalarǵa kóńil bólinse, al 70 paıyzynda «Samuryq-Qazyna» AQ kompanııalary bar óńirlerdegi jergilikti jobalar men áleýmettik ınvestısııalar baǵdarlamalaryna basymdyq beriledi. Jobalarǵa baılanysty qordyń ózi bastama kótere alǵannan tys, jergilikti úkimettik emes uıymdar da oǵan ótinim bere alady.
– Úkimettik emes uıymdarmen jumys úshin iske qosylǵan +7 (7172) 57-68-98 jedel jeli nómirinde qor qyzmetkerleri ótinimderdi qabyldaý qaǵıdalaryn túsindirip, keri baılanys ornatqan. Qordyń qyzmetin túsindirý úshin turaqty negizde tikeleı is-sharalar ótkiziledi. Jyl basynan beri 7 oblysta jáne elordada 600-den astam úkimettik emes uıymnyń qatysýymen kezdesýler uıymdastyryldy. Aımaqtyq úkimettik emes uıymdardan elimizdiń eń shalǵaı jerlerindegi adamdardyń ómirin qalaı jaqsartýǵa bolatyny týraly qyzyqty ıdeıalar kútemiz. Bul tusta qor azamattyq sektordy shaǵyn bastamalarynyń aýqymyn keńeıtýge shabyttandyrýǵa kúsh salmaq. Mysaly, shaǵyn qalanyń bastamalary búkil oblys, tipti barsha el úshin ıgilikti bolýy múmkin. Sondyqtan belsendi úkimettik emes uıymdardy yntymaqtastyqqa shaqyramyz, – deıdi qordyń bas dırektory.
