Densaýlyq saqtaý mınıstrliginiń keshegi málimetine súıensek, 19 571 adam koronavırýs ınfeksııasynan emdelýde, olardyń ishinde 1 472 pasıent stasıonarda, 18 099 naýqas ambýlatorııalyq deńgeıde em qabyldaýda. Indetke shaldyqqandardyń arasynda 33 adamnyń jaǵdaıy aýyr, 12 pasıenttiń jaǵdaıy óte aýyr, 6 naýqas О́JJ apparatynda jatyr.
Elimiz boıynsha ekpe alýshylardyń da qatary kún saıyn artýda. Naqtyraq aıtsaq, birinshi komponent 10 777 692 adam vaksına saldyrdy, ekinshi komponent – 10 506 711 adam alǵan. Revaksınalanǵandar sany – 4 977 049 adam. Al Pfizer vaksınasynyń birinshi dozasyn 1 231 796 adam saldyrsa, ekinshi dozasyn 1 179 694 adam saldyrdy. Onyń ishinde birinshi komponent vaksına saldyrǵan jasóspirimder – 869 781, júkti áıelder – 41 334, bala emizetin áıelder – 145 108. Al ekinshi komponent saldyrǵan jasóspirimder – 850 809, júkti áıelder – 39 024, bala emizetin áıelder – 140 438 adam.
Densaýlyq saqtaý mınıstrligi Vaksınamen basqarylatyn ınfeksııalardy baqylaý basqarmasynyń bas sarapshysy Aıdana Ergasen koronavırýsqa qarsy vaksına alý aýrýdan qorǵanýdyń birden-bir joly ekenin alǵa tartty.
«Adam eń aldymen eki dozamen tolyq vaksınalaýdan ótýi kerek. Sodan keıin 6 aıdan keıin ımmýnıtet tómendeı bastaıdy. Ony zertteýler kórsetip otyr. Sondyqtan 6 aıdan soń 3-dozany, taǵy 6 aıdan soń 4-dozany alýdy usynamyz. Onyń adam aǵzasyna keri áseri joq. Qaıta koronavırýs ınfeksııasyna qarsy ujymdyq ımmýnıtetti saqtap turady. Jańa shtamdardyń shyǵýyna tosqaýyl bolady», dedi maman.
Elordada «Omıkron» jáne «Stels-Omıkron» koronavırýs shtamdaryna baılanysty epıdemııalyq jaǵdaı nasharlap, qalanyń «sary aımaqqa» ótkenin jazǵan edik. Osyǵan baılanysty Nur-Sultan qalasynyń Bas memlekettik sanıtarlyq dárigeri birqatar shekteý sharasyn qabyldady. Dálirek aıtsaq, naýqaspen jaqyn baılanysta bolǵan adamdardy qashyqtan jumys isteýge aýystyrý, COVID-19-ǵa qarsy vaksınalaýǵa absolıýtti qarsy kórsetilimderi bar qyzmetkerlerdi jáne júkti áıelderdi qashyqtan jumys isteýge aýystyrý, adam kóp jınalatyn oryndarǵa (saýda oıyn-saýyq ortalyqtary, saýda úıleri, jabyq bazarlar, konsert zaldary, teatrlar, kınoteatrlar, stadıondar jáne basqa da sport ǵımarattary jáne t.b.) barǵan kezde, sondaı-aq 5 jasqa deıingi balalardy qospaǵanda jáne tamaqtaný kezinde, qalalyq qoǵamdyq kólikte jol júrgen kezde maska taǵý, 10-nan asa adamnyń qatysýymen ótetin jıyndardy onlaın formatqa kóshirý usynyldy.
Sonymen qatar elordalyq sanıtarlyq-epıdemııalyq baqylaý departamenti barlyq adamdy esh sebepsiz kóp jınalatyn oryndarǵa barmaýǵa, shekteý sharalaryn saqtaýǵa shaqyrady.
