Ishki ister mınıstrligi Ákimshilik polısııa komıteti tóraǵasynyń orynbasary Jandos Muratálıevtiń málimetinshe, jyl basynan beri jol apattarynda myńnan astam adam qaza taýyp, 8 myńnan astam jolaýshy jaraqat alǵan. Kún saıyn elimizdiń joldarynda 10-ǵa jýyq adam qaza taýyp, 70-ke jýyq adam túrli dene jaraqatyn alady eken. Vedomstvolyq málimetterge sáıkes, ótken aptada ǵana elimizde 200-den astam jol-kólik oqıǵasy tirkelip, saldarynan 50-ge jýyq adam qaza taýyp, 200-den astam adam jaraqat alǵan. Kámeletke tolmaǵan jasóspirimderdiń qatysýymen bolatyn oqıǵalar erekshe alańdaýshylyq týdyrady. Jyl basynan beri 2 myńǵa jýyq bala túrli jaraqat alyp, 90-nan astam jetkinshek qaıtys bolǵan.
– Elimizdiń joldarynda azamattardyń ómiri men densaýlyǵyn saqtaý – Ishki ister mınıstrliginiń basym mindetteriniń biri. Ony iske asyrý úshin jol qaýipsizdigi deńgeıin arttyrýǵa baǵyttalǵan uıymdastyrýshylyq, praktıkalyq jáne quqyqtyq sharalar kesheni qabyldandy. Jol apattaryn taldaý barysynda jyldamdyq rejimin asyrý, manevr jasaý erejelerin buzý, qarama-qarsy júris jolaǵyna shyǵý, aýdarylý, jaıaý júrginshilerdi basyp ketý sııaqty jol erejeleri jıi buzylady.
«Qaýipsiz jol» aıynyń alǵashqy aptasynda 46 myńnan astam jol júrý qaǵıdalaryn buzý derekteri anyqtaldy. Onyń ishinde 270 júrgizýshi avtokólikti mas kúıinde basqarǵany, 153-i qarsy jolaqqa shyǵyp ketkeni, 7 myńnan astamy jyldamdyq rejimin saqtamaǵany úshin jaýapkershilikke tartyldy. Zańsyz qaıta jabdyqtaýdyń 400-ge jýyq deregi jáne manevr jasaý erejelerin buzýdyń 3 myńǵa jýyq deregi tirkeldi. Sondaı-aq jolaýshylardy zańsyz tasymaldaǵan 60-tan asa júrgizýshi anyqtaldy.
Tehnıkalyq aqaýlary bar, reıs aldyndaǵy tehnıkalyq baıqaýdan ótpegen kólik quraldaryn paıdalanýǵa shyǵarǵany, sondaı-aq jolaýshylardy avtokólikpen tasymaldaýdy júzege asyrý kezinde júrgizýshini medısınalyq baıqaýdan ótkizbeı kólik basqarýǵa jibergeni úshin 48 kásipkerlik sýbektisi ákimshilik jaýapqa tartyldy. Sonymen qatar 40-qa jýyq ruqsat etilmegen turaq anyqtaldy, – deıdi Jandos Muratálıev.
Aı sheńberinde avtojoldardyń qaýipti ýchaskelerine qosymsha tekserýler júrgizilgen. Nátıjesinde, 20 apatty-qaýipti oryn anyqtalǵan. Joldardy kútip ustaýdaǵy kemshilikterdi joıý úshin 749 uıǵarym berilgen. Joldardy kútip ustaýǵa jaýapty tulǵalarǵa qatysty 500 ákimshilik hattama toltyrylyp, qosymsha 350-ge jýyq jol belgileri ornatylǵan.
Osy jyldyń 11 shildesinde Memleket basshysy Qasym-Jomart Toqaev «Qazaqstan Respýblıkasynyń Ákimshilik quqyq buzýshylyq týraly Kodeksine engizilgen ózgerister men tolyqtyrýlar týraly» Qazaqstan Respýblıkasynyń Zańyna qol qoıǵan bolatyn. Zań aǵymdaǵy jyldyń 9 qyrkúıeginde kúshine enedi. Oǵan sáıkes, túzetýlermen kólik quralyn memlekettik nómirlersiz qaıta basqarǵany úshin ákimshilik jaýapkershiliktiń jańa quramy engizildi (590-bap 2-1 B.), onda 20 AEK mólsherinde aıyppul túrinde óndirip alý nemese kólik quraldaryn basqarý quqyǵynan 1 jyl merzimge aıyrý kózdelgen. Buryn mundaı norma bolmaǵan edi. Budan basqa, kórineý jalǵan nemese jalǵan memlekettik nómirleri bar kólik quralyn basqarý úshin jaýapkershilik kúsheıtildi. Aıyppul túrindegi jaza alynyp tastaldy, endi atalǵan quqyq buzýshylyq úshin tek 1 jyl merzimge kólik quraldaryn basqarý quqyǵynan aıyrý jáne 5 táýlikke deıin ákimshilik qamaýǵa alý qoldanylmaq. Buǵan deıin 20 AEK mólsherinde aıyppul nemese 1 jyl merzimge basqarý quqyǵynan aıyrý qarastyrylǵan bolatyn.
Qazirgi ýaqytta Ishki ister mınıstrligi qala syrtyndaǵy trassalarda «ortasha jyldamdyqty» arttyrǵany úshin kólik quraldarynyń júrgizýshilerin jaýapkershilikke tartý múmkindigin kózdeıtin túzetýlerdi pysyqtap jatyr.
Aıtpaqshy, 1 shildeden bastap elektr samokattarynyń tehnıkalyq sıpattamalaryn belgileıtin ulttyq standart kúshine endi. Oǵan sáıkes, elektrosamokatty basqaratyn adamnyń quqyqtyq mártebesi týraly máselesi qarastyrylyp, olardyń joldarmen júrý tártibi anyqtalmaq.
