Nellı 1957 jyldyń 29 shildesinde dúnıege keldi. Ol Tájikstannyń soltústik betkeıinde ornalasqan Sogdıı oblysynyń Shýrab aýylynda týǵanymen, sportshy retinde Qazaqstanda qalyptasty. Bolashaq juldyzdyń balaýsa shaǵynda ata-anasy Shymkentke qonys aýdarǵan. Sol jaqta Kım jergilikti jattyqtyrýshy Vladımır Baıdınniń qol astynda sporttyq gımnastıkanyń qyr-syryna qanyǵyp, ýaqyt oza bıik belesterdi baǵyndyrdy.
Jetpisinshi jyldary sporttyń bul túrinde kileń juldyzdar bir-birimen saıysqa túsip, asa iri halyqaralyq jarystardyń júldelerin ózara sarapqa salyp júrdi. Solardyń arasynan Lıýdmıla Týrısheva, Olga Korbýt, Elena Mýhına, Elvıra Saadı (KSRO), Nadıa Komenechı, Teodora Ýngýrıaný (Rýmynııa), Karola Dombek, Annelora Sınke, Angelıka Helman (GDR), Marta Egervarı (Majarstan) jáne taǵy basqalardy bóle-jara atap ótsek, esh aıyby joq. Solardyń qatarynda bizdiń Nellı de boldy.
Qazaqstandyq gımnasshy Odaq kólemindegi jarystarda ozǵan soń, halyqaralyq dodalarda baq synaı bastady. 1974-1980 jyldary ol álem chempıonatynda 11 ret (5 altyn+4 kúmis+2 qola) jeńis tuǵyryna kóterildi. Eýropa birinshiliginde toǵyz márte (2+3+4) oljaǵa keneldi. 1976 jyly Monrealda alaýy tutanǵan Olımpııa oıyndarynda Nellı Kım erkin jattyǵý men qoldy tirep jasalatyn jattyǵýda eń joǵary 10 upaıdy ıelenip, bas júldeni oljalady. Sonyń aldynda ǵana dál sondaı kórsetkishke Komenechı de qol jetkizgen edi. Osylaısha, olardyń esimderi asa joǵary baǵaǵa ıelik etken tuńǵysh gımnasshylar retinde tarıhta qaldy. Bul tartysta ol Lıýdmıla Týrısheva, Karola Dombek jáne Nadıa Komenechıdi artta qaldyrdy. Sondaı-aq jerlesimiz komandalyq básekede altyn alyp, kópsaıysta kúmispen kúpteldi.
1980 jyly Máskeý Olımpıadasynda Kım eki ret teńdessiz dep tanyldy. Erkin jattyǵýda ol Nadıa Komenechımen birdeı nátıje kórsetse, Maksı Gnaýk pen Natalıa Shaposhnıkova úshinshi oryndy ıelendi. Komandalyq saıysta óte kúshti básekelestik órbidi. Quramynda Komenechıden bólek, Emılııa Eberle, Rodıka Dýnka, Melıta Rıýn, Krıstına Grıgorash jáne Dýmıtrısa Týrner syndy myqtylary bar rýmynııalyqtar óte kúshti qarsylyq kórsetti. Qola medaldy qanaǵat tutqan GDR-dyń da bastapqydaǵy qarqyny qatty boldy. Desek te, bul básekede KSRO gımnasshylary aldaryna jan salmady. Altynnan alqa taqqandar arasynda Elena Davydova, Natalıa Shaposhnıkova, Marııa Fılatova, Stell Zaharova jáne Elena Naımýshınamen birge bizdiń Nellı Kım de bar edi.
Úlken sporttan qol úzgennen keıin otandasymyz Ońtústik Koreıa, Italııa jáne Belarýs quramalaryn jattyqtyrdy. Basqa da memleketterde bapkerlik qyzmet atqardy. Álemdegi eń beldi tóreshilerdiń biri retinde kóptegen dúbirli dodada qazylyq etti. 2004 jyly Kım Halyqaralyq gımnastıka federasııasy tehnıkalyq komıtetiniń tóraıymy bolyp saılandy.
Bul kúnderi Nellı Kım AQSh-tyń Mınneapolıs qalasynda turyp jatyr.
