Qazaqstan dzıýdo federasııasynyń málimeti boıynsha, tórt kúnge jalǵasatyn sary qurlyq dodasynda tatamı sheberleri jekeleı jáne aralas-komandalyq jarys boıynsha ózara myqtyny anyqtaıdy. Halyqaralyq dzıýdo federasııasynyń (IJF) kúntizbesine sáıkes ótkiziletin jarysqa Azııanyń 30 elinen 400-ge jýyq dzıýdoshy qatysady dep josparlanǵan.
«Qazaqstan dzıýdodan álemdik básekelerdi ótkizý boıynsha mol tájirıbege ıe. Osy ýaqytqa deıin Halyqaralyq dzıýdo federasııasy elimizge álemdik lısenzııalyq Gran-prı jarystarynan bólek, eresekter arasyndaǵy álem chempıonaty (2015, Nur-Sultan) men jasóspirimder arasyndaǵy álem birinshiligin (2019, Almaty) ótkizýdi senip tapsyrǵan. 2017 jyldan beri Azııa dzıýdo odaǵynyń kúntizbesine sáıkes, jylda elimizde jasóspirimder, jastar jáne eresekter arasynda dástúrli túrde eki ret Azııa kýbogy básekesi ótkizilip kele jatyr. Endi, mine, bıyl Azııa chempıonatyn ótkizý quqyǵyna ıe boldyq. Bul – sportshylarymyz úshin ǵana emes, sondaı-aq otandyq dzıýdo sporty jankúıerleri úshin de tamasha jańalyq. Mundaı iri jarystardy elimizde ótkizý arqyly sportshylarymyzdyń tájirıbesin shyńdap qana qoımaı, álemdik arenada sport derjavasy retinde qalyptasqan ımıdjimizdi nyǵaıta túsemiz. Elorda tatamıine Azııa úzdikteri bas qosyp, jańa esimder shyǵady dep úmittenemiz. Kýmırlerine qarap boı túzep kele jatqan jas býyn úshin de bul qýanyshty jańalyq ári keremet múmkindik dep oılaımyn», deıdi Qazaqstan dzıýdo federasııasy prezıdentiniń mindetin atqarýshy Ashat Jitkeev.
Ulttyq qurama bapkerleriniń sheshimimen elimizde ótetin sary qurlyq básekesinde Qazaqstannyń erler jáne áıelder quramasy sapynan negizgi jáne qosalqy quram sportshylary qatysady. Ulttyq qurama sapyndaǵy dzıýdoshylar úshin qurlyqtyq báseke jyldyń basty dodasy – 6-13 qazan aralyǵynda О́zbekstan astanasy – Tashkentte uıymdastyrylatyn álem chempıonatyna daıyndyq jumysy bolsa, qurama qataryna endi ǵana qosylǵan jas dzıýdoshylar úshin elordadaǵy Azııa chempıonaty sııaqty iri jarystyń atmosferasyn sezinip, tájirıbe jınaýǵa múmkindik bermek.
Aıta keterligi, IJF erejesi boıynsha, Azııa chempıonatynyń jeńimpazdary men júldegerlerine Olımpıadalyq reıtıngte upaı sandary qosylady. Atap aıtqanda, jeńimpaz sportshy 700 upaı enshilese, 2-oryn ıegerine – 490, al 3-oryn alǵan sportshyǵa 350 upaı beriledi.
