Jazǵy oıyndardyń ashylý saltanatyna qaraqurym halyq jınaldy. «Besarys» kógaldaǵy hokkeı stadıonynda ıne shanshar oryn bolǵan joq. Betashar sózdi Jetisý oblysynyń ákimi Beıbit Isabaev sóılep, sportshylarǵa sáttilik tiledi.
«Jasóspirimder tárbıesi – búgingi kúnniń asa ózekti máseleleriniń biri. Olardy buqaralyq sportqa tartý arqyly erik-jigerin shyńdaý, minez-qulqyn tárbıeleý, rýhyn bekemdeý – bizdiń ortaq mindetimiz. Osy oraıda búgingi bastalyp otyrǵan jazǵy oıyndardyń mańyzy zor. «Júzden – júırik, myńnan – tulpar» demekshi, árdaıym Kók týymyzdy joǵary ustap, abyroı bıiginen kórinińizder. Barsha sportshylarǵa sáttilik pen jeńis tileımin», dedi B.Isabaev.
Jarys baǵdarlamasyna sáıkes, voleıbol men asyq atý «Jastar» sport saraıynda, grek-rım kúresi, erkin kúres, qazaq kúresi «О́rken» sport kesheninde, dzıýdo «Jastar 2» sport kesheninde, shaǵyn fýtbol «Bolashaq» stadıonynda, kógaldaǵy hokkeı «Besarys» stadıonynda, basketbol 3h3-ten I.Jansúgirov atyndaǵy ýnıversıtettiń sport kesheninde, ústel tennısi «Jetisý» tennıs ortalyǵynda, toǵyzqumalaq Jastarǵa qyzmet kórsetý ortalyǵynda, armrestlıng О́tenaı aýyldyq okrýginiń mádenıet úıinde ótedi. Jazǵy oıyndar 3 tamyzǵa deıin jalǵasady.
Eske salsaq, tórt jylda bir ret jalaýyn jelbiretetin bul doda osyǵan deıin 2018 jyly Syr óńirinde ótken bolatyn.
Aımaqtaǵy jas sportshylardyń jetistikterine qysqasha toqtalsaq, jyl basynan beri halyqaralyq jáne respýblıkalyq jarystarda oblys qorjynyna túrli dárejedegi 900 medal tústi. Jalpy, oblys aýmaǵynda kásipqoı klýbtardan «Jetisý» fýtbol klýby, «Jastar» oıyndyq sport túrleri klýby jáne «Olımp» regbı klýby bar. Bul rette «Besarys» kógaldaǵy hokkeı komandasy byltyr el chempıonatynda erler arasynda 1-oryn, áıelder arasynda 2-oryn ıelengen. Sonymen qatar bıyl Taılandta ótken Azııa Kýbogynda áıelder komandasy 1 jáne erler arasynda 2-oryn ıelenip, 2023 jyly Afrıka elinde ótetin álem chempıonatyna joldama utyp aldy.
Sportshylar ishinde toǵyzqumalaqtan jasóspirimder arasyndaǵy Azııa chempıony Arsen Esentaıdy, shahmattan Azııa chempıony, álem chempıony Elnaz Qalıahmetti, dzıýdodan III jazǵy jasóspirimder Olımpıada oıyndarynyń jeńimpazy Bekarys Sádýaqasty, velosporttan Evgenıı Fedorovty, sol sııaqty 2022 jyldyń basynan karate shotokannan I Azııa chempıonatynyń jeńimpazdary Saılaý Mıratty, Mıhaıl Pýshkındi, júldegerler – Ramazan Ibegendi, Salaýat Rahymovty, Argúl Májıtovany, Aýyr atletıkadan jasóspirimder men qyzdar arasynda Azııa chempıonatynyń kúmis medal ıegeri Nadejda Lıdi maqtanyshpen aıtamyz.
Jetisý oblysy
